Tərk-silah üzrə BMT-nin konfransı martın 28-dək davam edəcək
Bakı, 21 yanvar, AZƏRTAC
BMT yaradılandan bəri çoxtərəfli tərk-silah və silahların məhdudlaşdırılması məqsədləri təşkilatın beynəlxalq sülhü və təhlükəsizliyi qorumaq səylərində mərkəzi yer tutur. Tərk-silah üzrə konfransın növbəti sessiyası yanvarın 20-də başlayıb və martın 28-dək davam edəcək.
AZƏRTAC-ın BMT-nin saytına istinadla verdiyi xəbərə görə, sessiyanın gündəliyində duran əsas mövzular nüvə silahlanması yarışına son qoyulması və nüvə tərk-silahı, bütün əlaqəli məsələlər də daxil olmaqla nüvə müharibəsinin qarşısının alınması, kosmosda silahlanma yarışına son qoyulması, nüvə silahı olmayan dövlətləri nüvə silahından istifadə təhlükəsinə qarşı təmin etmək üçün effektiv beynəlxalq müqavilələrin bağlanması, kütləvi qırğın silahlarının yeni növləri və bu cür silahların yeni sistemləri, radioloji silahlar, hərtərəfli tərk-silah proqramı və silahlanmada şəffaflıqdır.
Konfransın 65 üzvü, o cümlədən Nüvə Silahlarının Yayılmaması Müqaviləsinə (NPT) əsasən beş nüvə dövləti ilə yanaşı, tədbirdə üzv olmayan dövlətlər də iştirak edir.
BMT-nin Baş katibi Antonio Quterreş Yaxın Şərqdəki vəziyyətlə bağlı Təhlükəsizlik Şurasının iclasında çıxış edərək beynəlxalq ictimaiyyəti Qəzzada atəşkəs razılaşmasının təqdim etdiyi fürsətdən istifadə etməyə, bu ərazidə idarəetmə və təhlükəsizlik məsələlərinin həlli istiqamətində səyləri gücləndirməyə çağırıb.
“Dünən (19 yanvar – red.) birinci mərhələ çərçivəsində girov götürülən ilk üç qadın azad edilib. Bundan başqa, 90 fələstinli məhbus da sərbəst buraxılıb. Bu mübadilə hər iki tərəfdəki ailələrə rahatlıq gətirdi”, deyə Antonio Quterreş bildirib.
Baş katib vurğulayıb ki, BMT Qəzzaya humanitar yardımın həcmini artırmaqda davam edir: Təkcə bazar günü bu əraziyə humanitar yük daşıyan 630-dan çox yük maşını gəlib.
Antonio Quterreş humanitar təşkilatlar, o cümlədən BMT-nin Fələstinli Qaçqınlara Yardım və İşlər üzrə Agentliyi (UNRWA) üçün anklavlara "sürətli, təhlükəsiz və maneəsiz" girişin zəruriliyini vurğulayıb.
Baş katib çıxışında Yaxın Şərqi qeyri-müəyyənlik və böyük imkanlarla dolu “dərin transformasiya dövrü” yaşayan region kimi xarakterizə edib.
“Bizim borcumuz odur ki, Yaxın Şərq xalqları bu təlatümlü dövrdən sülh, ləyaqət və daha yaxşı gələcəyə ümidlə çıxsın”, - deyə Antonio Quterreş vurğulayıb.
Livana son səfəri zamanı çıxış edən Quterreş ölkədəki siyasi tərəqqi ilə bağlı nikbinliyini ifadə edərək bütün Livan xalqının maraqlarını təmsil edəcək və onların təhlükəsizliyinə təminat verəcək hökumətin formalaşdırılması səylərini qeyd edib.
Bölmənin digər xəbərləri
