Azərbaycan Beynəlxalq Əməliyyat Şirkətindən
AZƏRTAC-a bildirmişlər ki, Səngəçal terminalı ərazisində “Şahdəniz”dən çıxarılan qazın texnoloji emal obyekti tikintisinin 90 faizdən çoxu tamamlanmışdır. Səngəçal terminalının genişləndirilməsi proqramı (STGP) üzrə işçi qüvvəsinin əksəriyyəti hazırda “Şahdəniz” hissəsinə cəlb olunmuşdur. “Şahdəniz” hissəsinin tikinti işlərinə 2003-cü ilin noyabrında başlanmışdır və onun 2006-cı ilin sentyabrında tamamlanması nəzərdə tutulur. Bundan sonra isə iş proqramı terminaldakı Şahdəniz qaz qurğularının istismar sınaqlarına və onların fəaliyyətə başlamasına yönəldiləcəkdir.
STGP ərazisində “Şahdəniz” obyektlərinin bir hissəsi kimi iri kompressor stansiyası da tikilir. “Şahdəniz” qazının Azərbaycana, Türkiyəyə və Gürcüstana ötürülməsi üçün istifadə ediləcək bu kompressor və ölçmə stansiyasının tikintisi də cədvəli qabaqlayır. Bu stansiyanın tikintisini cari ilin ikinci rübündə başa çatdırmaq nəzərdə tutulur.
Tikintinin ümumilikdə 88 faizi başa çatdırılmışdır ki, bu da cədvəli 3 faiz qabaqlayır.
