TƏRTƏRDƏ İCTİMAİ DİNLƏMƏLƏR KEÇİRİLMİŞDİR
AZƏRTAC xəbər verir ki, ombudsman Elmira Süleymanova Tərtər rayonunda insan hüquqlarının müdafiəsi üzrə Milli Fəaliyyət Planının (MFP) təbliği və tətbiqi vəziyyəti ilə bağlı ictimai dinləmələr keçirmişdir.
Tədbirdə E.Süleymanova respublikada insan hüquqlarının qorunması sahəsində mövcud vəziyyət, MFP qəbul olunduqdan sonra görülmüş işlər, sənədin tətbiqi ilə bağlı regionlarda keçirilən ictimai dinləmələr, dairə seçki komissiyalarının üzərinə düşən vəzifələr barədə danışmışdır.
Milli Qeyri-Hökumət Təşkilatları Forumu idarə heyətinin sədri Aydın Kərimov insan hüquqlarının qorunmasında, hüquqi maarifləndirmə işlərinin aparılmasında qeyri-hökumət təşkilatlarının rolundan, rayon icra hakimiyyətinin başçısı Vidadi İsayev regionların sosial iqtisadi inkişafı Dövlət Proqramı çərçivəsində görülən işlərdən, əhalinin sosial problemlərinin həll olunmasından bəhs etmişlər.
Müzakirələrdə çıxış edənlər MFP-də məhkəmə, prokurorluq və polis orqanları qarşısında qoyulmuş vəzifələrin icrası istiqamətində görülmüş işlər, müvafiq dövlət orqanlarında insan hüquq və azadlıqlarının təmin olunmasına xüsusi nəzarət, vətəndaşlara şəxsiyyət vəsiqələrinin verilməsi sahəsində vəziyyət barədə məlumat vermişlər.
Bölmənin digər xəbərləri
