Tibbi göstəriş olmadan qeysəriyyə əməliyyatını həyata keçirəcək həkimlər cəzalandırılacaqlar
Bakı, 31 oktyabr (AZƏRTAC). Milli Məclisdə qeysəriyyə kəsiyi əməliyyatının tibbi əsaslarının müəyyənləşdirilməsini nəzərdə tutan qanunun qəbul edilməsi vaxtında atılmış addımdır. Bu qaydalara əsasən, cərimə sanksiyaları nəzərdə tutulmuşdur və tibbi göstəriş olmadan qeysəriyyə əməliyyatını həyata keçirəcək həkimlər və tibb müəssisələri cəzalandırılacaqlar.
AZƏRTAC xəbər verir ki, bu sözləri səhiyyə nazirinin müavini Elsevər Ağayev jurnalistlərə açıqlamasında bildirmişdir. Vurğulamışdır ki, dövlət müəssisələri ilə yanaşı, özəl tibb müəssisələrində də müxtəlif tibbi prosedurların həyata keçirilməsi üçün hər cür şərait vardır. Azərbaycanda 500-dək tibb müəssisəsinə fəaliyyət göstərmək üçün lisenziya verilmişdir. Səhiyyə Nazirliyi bütün tibb müəssisələrinə nəzarət etsə də yayınma halları da müşahidə olunur.
E.Ağayev qeyd etmişdir ki, dünyada qəbul olunmuş standartlara əsasən, doğuşların 16 faizinin qeysəriyyə əməliyyatları ilə aparılmasına icazə verilir. Amma təəssüflər olsun ki, bundan həkimlər də pasiyentlər də bir qədər sui-istifadə edirlər. Doğuşa gələn insanların əksəriyyəti qeysəriyyə əməliyyatlarına üstünlük verir.
Bölmənin digər xəbərləri
