Tingçilik təsərrüfatında yaz işlərinə başlanılıb VİDEO
Tərtər, 1 mart, Tahir Ağaməmmədov, AZƏRTAC
Cəbhə bölgəsində yerləşən Tərtər rayonunda əhalinin əsas məşğuliyyət növlərindən biri bağçılıq və tingçilikdir. Son illərdə kənd təsərrüfatının digər sahələri kimi, bu istiqamətdə də inkişafa nail olunub.
“Meyvə tinglərinə zəmanət vermək üçün müqavilə bağlayır, notariusda təsdiqlədirik”
Qaraağacı kəndi ərazisindəki tingçilik təsərrüfatının rəhbəri Mütalib Qurbanov AZƏRTAC-a müsahibəsində müxtəlif növ ağac tingləri yetişdirdiyini deyib: “Uzun illərdir tingçiliklə məşğul oluram. Təsərrüfatı yaratmaqda məqsədim daha çox tələbat olan meyvə tinglərini xaricdən gətirib, yerli torpaq-iqlim şəraitinə uyğunlaşdırmaq və çoxaltmaqdır. Bağ salan fermerlərə tingləri satarkən ağacların düzgünlüyünə zəmanət vermək üçün müqavilə bağlayır, notariusda təsdiqlədirik. Bu, tingi satan tərəfin daha məsuliyyətli olmasına, alan tərəfin isə inamının artmasına səbəb olur”.
M.Qurbanov bildirib ki, təsərrüfatında gilasın “Öküzürəyi”, “Napoleon”, “Ağ Krım”, “May”, şaftalının “Nektarin”, “Fədai”, əriyin “Mayovka”, “Ağ ərik”, alçanın “Hibrit alça”, “Naxçıvan göyçəsi”, “Qırmızı alça”, gavalının “Yapon gavalısı”, “Sarı Albuxarı”, “Armudu”, Şərq xirniyinin “Karolyok”, “Şişburun”, “İspan”, tutun “Bedana”, “Şah tur”, almanın “Qızıləhmədi”, “Qəndil-sinab”, “Keyxura”, “Simerenko”, “Ağ palmet”, “Qırmızı palmet”, armudun “Yerli düşes”, “Bildirçinbud”, “Abbasbəyi”, “Lətifə”, “Özbək gözəli” və sair sortları calanır.
Tinglər alıcılara 1-1,5 manata təklif olunur
Ötən il bu təsərrüfatda 1,7 hektar sahədə 30 min ədəd meyvə tingi yetişdirilib. Əsasən göz calağından istifadə olunub. Çünki bu üsulla calaqların tutma faizi yüksəkdir. Calaq komponentləri yaxşı qovuşur, calaqvurma zamanı az qələm tələb olunur. Calaqaltı materiallar kimi cır ağaclara üstünlük verilir. Göz calağı Şərq xurmasında aprel ayında, digər ağaclarda isə avqust ayında vurulur. Məhsuldar, sağlam, yerli şəraitə davamlı ağaclardan isə calaqüstü material kimi istifadə olunur. “Bizim iqlimə uyğunlaşıb-uyğunlaşmayacağını yoxlamaq üçün şaftalının “Nektarin” sortunu Gürcüstandan gətirmişəm. Nəticə müsbət oldu. Meyvəsinin böyüklüyü, dadı və rəngi yerli sortlardan fərqlənir. Bundan başqa, Göyçaydan alçanın “Naxçıvan göyçəsi”nin, Xaçmazdan gilasın “Napoleon” sortlarının qələmlərini gətirib caladım. Bu tinglərə, həmçinin armudun “Özbək gözəli”, almanın “Gürcüstan keyxurası”, Şərq xurmasının “Şişburun” sortlarına böyük tələbat var. Tinglərin qiyməti meyvə sortlarından və ağacların böyüklüyündən asılı olaraq dəyişir. Tinglər alıcılara 1-1,5 manata təklif olunur. Əsasən yeni bağ salmaq istəyənlər və ting satışı ilə məşğul olanlar müraciət edirlər. Yetişdirilən tinglər ətraf rayonlarla yanaşı, Bakı şəhərinə və respublikanın digər regionlarına da aparılır”, - deyə təsərrüfat rəhbəri bildirib.
Tingçilik təsərrüfatı genişləndiriləcək, meyvə bağları salınacaq
M.Qurbanov deyir ki, dövlətin aqrar sahənin inkişafına dəstəyi onu təsərrüfatı genişləndirməyə həvəsləndirib: “Tingçiliklə yanaşı, meyvəçiliklə də məşğul olmaq istəyirəm. 3 hektar sahədə Şərq xurması və şaftalı əkməyi planlaşdırıram. İnanıram ki, istehsal etdiyimiz məhsulları xarici bazara da çıxara biləcəyik”.
Hazırda tingçilik təsərrüfatında yaz işləri aparılır. Calaqların polietilen sarğısı, həmçinin calanmış ağacların gözdən yuxarı hissəsi kəsilib atılır, tinglərin dibi yumşaldılır.
Qeyd edək ki, Tərtər rayonunda 1180,6 hektar meyvə bağları və 11,1 hektar üzümlük var. Son bir ildə rayon ərazisində 7 hektar yeni meyvə bağları və 2,8 hektar giləmeyvəlik salınıb, 1 milyon 505 min 872 ədəd meyvə və 141 min 344 ədəd dekorativ bitki tingi yetişdirilib.
Bölmənin digər xəbərləri
