Tokioda koronavirus xəbərdarlığının səviyyəsi qaldırılıb
Tokio, 16 iyul, AZƏRTAC
Yaponiyanın paytaxtı Tokio şəhərində koronavirus xəbərdarlığının səviyyəsi son bir neçə gündə yoluxma halları üçrəqəmli həddi keçdiyinə görə maksimum səviyyəsinə qaldırılıb.
AZƏRTAC xəbər verir ki, bununla əlaqədar Tokio hökuməti sakinləri ehtiyat tədbirlərinə ciddi şəkildə əməl etməyə çağırıb.
Yaranmış vəziyyəti şərh edən Tokionun qubernatoru Koike Yuriko deyib: “Biz qərara gəldik ki, əhalini xəbərdar etmək üçün həyəcan səviyyəsini qaldıraq. İnfeksiya yayılmaqda davam edir”.
Bildirilir ki, bazar günü də daxil olmaqla, sonrakı dörd gündə Yaponiya paytaxtında virus ilə bağlı 200-dən artıq yoluxma halı qeydə alınıb. Bundan sonra həmin göstərici qismən azalsa da, bu rəqəm 100-dən yuxarıdır. İyulun 15-də 165 nəfərin virusa yoluxduğu qeydə alınıb.
Qeyd edilir ki, ümumiyyətlə Yaponiyada COVID-19-a yoluxma hallarının sayı artmaqda davam edir. Bütün Yaponiya ərazisində koronavirus testlərinə müsbət reaksiya verənlərin ümumi sayı 22 min nəfəri ötüb. Həyatını itirənlərin sayı isə 1000 nəfərə çatıb.
Hakimiyyət orqanları ölkənin cənubunda ABŞ hərbçilərinin yerləşdiyi Okinava prefekturasına xüsusi diqqətlə yanaşır. Burada koronavirusa yoluxanların sayı 130 nəfəri keçib.
Okinava prefekturasının qubernatoru Tamaki Denni bildirib ki, o, məsələni Müdafiə naziri Taro Kono ilə müzakirə edib. Müdafiə nazirindən ABŞ hərbi qüvvələrində yoluxanlarla əlaqədar vəziyyət barədə obyektiv informasiyanın sürətlə çatdırılmasına təsir göstərməsi xahiş olunub.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
