TORPAQ MÜLKİYYƏTÇİLƏRİ MEYVƏ-TƏRƏVƏZ VƏ KARTOF YIĞIMINI DAVAM ETDİRİRLƏR
Qəbələ Rayon İcra Hakimiyyətinin aqrar şöbəsindən AZƏRTAC-a bildirmişlər ki, cari ildə torpaq mülkiyyətçiləri 5342 hektar sahədə yazlıq bitkilər əkmişlər. Bunun 1035 hektarını kartof, 1971 hektarını tərəvəz, 1289 hektarını qarğıdalı, 923 hektarını isə birillik və çoxillik bitkilər təşkil edir.
Hazırda fermerlər və fərdi təsərrüfat sahibləri yetişdirdikləri kənd təsərrüfatı məhsullarını toplayırlar. Məhsul istehsalçıları bugünədək 126 hektar sahədən 264 ton tərəvəz, 132 hektardan isə 809 ton kartof yığmışlar. Hər hektarın məhsuldarlığı, orta hesabla müvafiq olaraq, 21 və 61 sentner təşkil etmişdir. Məhsul yığımı uğurla davam edir.
Həmçinin, bu il Qəbələdə 25 hektar sahədə fındıq, 26 hektar sahədə üzüm bağları salınmışdır. Dövlət Meşə Fondunun torpaqlarında 100 hektar sahədə əkin aparılmışdır ki, bunun da 28 hektarını palıd, 72 hektarını isə qiymətli meşə cinsləri olan qoz, şabalıd, göyrüş və ağcaqayın təşkil edir.
Bakı şəhərində təşkil olunan kənd təsərrüfatı məhsullarının satışı yarmarkalarında Qəbələ rayonunun fermerləri də fəal iştirak edirlər. Qəbələli torpaq mülkiyyətçiləri 2008-ci ildə paytaxtda keçirilən yarmarkalarda ümumilikdə 32 ton tumlu, 52 ton qərzəkli və 14 ton çəyirdəkli meyvələr, 14 ton tərəvəz məhsulları satmışlar.
Bölmənin digər xəbərləri
