İDMAN
“Tottenhem” səfərdə, “Mançester Siti” isə öz meydanında qalib gəlib
Bakı, 16 iyul, Nicat Məmmədov, AZƏRTAC
İyulun 15-də futbol üzrə İngiltərə Premyer Liqasının 36-cı turunun oyunlarına start verilib.
AZƏRTAC xəbər verir ki, turun açılış görüşündə üç qarşılaşma oynanılıb.
“Mançester Siti” öz meydanında “Bormunt” komandasını qəbul edib. Oyunda hesabı meydan sahibləri erkən qolla (6-cı dəqiqə) açıb. David Silva fərqlənib. Birinci hissənin bitməsinə beş dəqiqə qalmış mançesterlilər hesab arasındakı fərqi iki topa çatdırıb. David Silvanın ötürməsini Qabriel Jesus dəqiq zərbə ilə tamamlayıb. Qarşılaşmanın ikinci hissəsinin 89-cu dəqiqəsində qonaqlar hesabı minimuma endirib. David Broks adını tabloya yazdırıb. Bu qələbədən sonra xal ehtiyatını 75-ə çatdıran “Mançester Siti” turnir cədvəlində ikinci, “Bormunt” isə 31 xalla 18-ci yerdə qərarlaşıb.
Günün digər maraq doğuran görüşü “St. James Park” stadionunda baş tutub. “Nyukasl Yunayted” klubu “Tottemhem” komandasını qəbul edib. Qarşılaşma qonaqların 3:1 hesablı qələbəsi ilə başa çatıb. Son Xın-Min, Hari Keyn (2) “Tottemhem”in, Matt Riçi isə “Nyukasl Yuneyted”in heyətində fərqləniblər.
“Börnli” - “Volverhemton” görüşündə qalib müəyyənləşməyib - 1:1.