Tramp Koreya Respublikası ilə birgə hərbi təlimlərin miqyasının azaldılması barədə tapşırıq verib
Bakı, 17 avqust, AZƏRTAC
ABŞ Prezidenti Donald Tramp Pentaqon rəhbəri Pit Heqsetə Koreya Respublikası ilə birgə hərbi təlimlərin miqyasının azaldılmasını tapşırıb.
AZƏRTAC xəbər verir ki, Ağ Ev rəhbəri bu barədə “Truth” sosial şəbəkəsində yazıb.
Tramp bildirib ki, bu təlimlər Şimali Koreyaya "düşmən siqnalı" göndərir. O, Şimali Koreya lideri Kim Çen Inla çox yaxşı münasibətlərinin olduğunu növbəti dəfə təkrarlayıb və ABŞ-nin Koreya Respublikası ilə birgə hərbi təlimlərdə iştirak etməyə çoxdan razılıq verməsindən narazılığını dilə gətirib.
"Bu təlimlər həm baha başa gəlir, çünki həmişəki kimi, bütün xərcləri ABŞ öz üzərinə götürür, həm də mənim prezidentliyim dövründə heç bir təhlükə yaratmayan və hörmət göstərən bir ölkəyə tamamilə uyğunsuz və “düşmən siqnalı” göndərir. Buna görə də, hərbi təlimləri ləğv etmək üçün çox gec olduğunu nəzərə alaraq, müdafiə naziri Pit Heqsetə onların miqyasını əhəmiyyətli dərəcədə azaltmağı tapşırmışam” - deyə ABŞ Prezidenti “Truth”da qeyd edib.
Tramp, həmçinin əlavə edib ki, bu yaxınlarda Koreya Respublikasını prezidentindən ölkəsinin İranın nüvəsizləşdirilməsində ABŞ-yə qoşulmaq istəyib-istəmədiyini soruşub, o isə "Xeyr, təşəkkür edirəm!" cavabını verib.
Bölmənin digər xəbərləri
