Mərakeşdə İspaniyanın Seuta anklavına keçməyə çalışan 111 miqrant saxlanılıb
Bakı, 16 avqust, AZƏRTAC
Mərakeş polisi sosial şəbəkələrdə yeni kütləvi miqrant keçidi ilə bağlı çağırışların yayılmasından sonra gücləndirilmiş təhlükəsizlik tədbirləri fonunda İspaniyanın Şimali Afrikadakı Seuta anklavına keçməyə cəhd edən azı 111 nəfəri saxlayıb.
AZƏRTAC xəbər verir ki, bu barədə Mərakeş Daxili İşlər Nazirliyindəki mənbə “Reuters”ə məlumat verib.
Saxlanılanlar arasında Saharadan cənubda yerləşən Afrika ölkələrindən olan 109 miqrant və iki Mərakeş vətəndaşı var.
İspaniyanın EFE xəbər agentliyinin məlumatına görə, Mərakeş polisi sərhəddən təxminən 3 kilometr məsafədəki təpələrdə toplaşan miqrant qruplarını dağıtmaq üçün gözyaşardıcı qazdan istifadə edib.
Seutada ispan hərbçiləri supermarketləri qoruyub, polis şəhərin əsas küçələrində nəzarəti gücləndirib. Şəhərdə vəziyyət iyulun 30-da baş verən və çoxsaylı insan tələfatı ilə nəticələnən kütləvi keçid cəhdindən sonrakı günlərlə müqayisədə daha sakit olub.
Madrid bundan sonra Seutanın sahillərində dəniz maneəsi quraşdırıb və materik İspaniyadan 500-dən çox əlavə polis əməkdaşı göndərib. Bununla anklavda xidmət aparan polis əməkdaşlarının ümumi sayı 1600-ü ötüb. Daxili İşlər Nazirliyi gücləndirilmiş qüvvələrin zərurət yarandığı müddətdə Seutada qalacağını bildirib.
İspaniyanın daxili işlər naziri Fernando Qrande-Marlaska avqustun 13-də bildirib ki, iyulun 30-da baş verən hadisələrin təkrarlanmasının qarşısını almaq və normal vəziyyəti mümkün qədər tez bərpa etmək üçün zəruri sayda əlavə qüvvələr göndəriləcək. Nazirin sözlərinə görə, hazırda Seutada təxminən 5 min miqrant qalır.
F.Qrande-Marlaska bildirib ki, Seutaya qanunsuz daxil olan miqrantların, müstəsna hallarda ciddi həssaslıq vəziyyətində olan şəxslər istisna olmaqla, anklavda qalmasına, İspaniyanın materik hissəsinə keçməsinə və ya hüquqi status əldə etməsinə icazə verilməyəcək. Qalma hüququ olmayan şəxslərin Mərakeşə qaytarılacağı qeyd olunub.
Bölmənin digər xəbərləri
