Türk ekspert: Azərbaycan beynəlxalq münasibətlər sisteminin əvəzolunmaz aktorudur
Ankara, 12 yanvar, AZƏRTAC
Prezident İlham Əliyevin yerli televiziya kanallarına verdiyi müsahibədə səsləndirdiyi bəyanatlar Azərbaycanın xarici siyasətinin uğurlarının miqyasını nümayiş etdirir. 2025-ci ildə baş verən proseslər rəsmi Bakının regional və qlobal məsələlərdə etibarlı tərəfdaş rolunu bir daha təsdiqləyib.
Bu fikirləri AZƏRTAC-a açıqlaması zamanı Türkiyənin Qafqaz Universitetinin (Qars şəhəri) müəllimi, beynəlxalq münasibətlər üzrə ekspert Halit Həmzəoğlu bildirib.
Onun sözlərinə görə, Azərbaycan Cənubi Qafqazda uzunmüddətli sülhün təmin olunması prosesinin ön cəbhəsində yer alır, tərəfdaşlığın dərinləşdirilməsi, yeni birgə təşəbbüs və layihələrin reallaşdırılması istiqamətində səylər göstərir. Bütün bunlar Azərbaycanın beynəlxalq münasibətlər sistemində əvəzolunmaz aktora çevrilməsini təmin edir.
Agentliyin həmsöhbəti qeyd edib ki, Azərbaycan liderinin 2026-cı il yanvarın 5-də verdiyi müsahibə bir sıra strateji əhəmiyyətli mesajlar ehtiva edir: “Prezident İlham Əliyev 44 günlük Vətən müharibəsində Azərbaycanın hərbi uğurlarının diplomatik müstəvidə atılan addımlarla möhkəmləndirildiyini vurğulayıb, ABŞ Prezidenti Donald Trampın iştirakı ilə avqust ayında Ağ Evdə keçirilmiş görüşün əhəmiyyətinə diqqət çəkib və Vaşinqton danışıqlarının nəticələrini ölkənin müstəqillik tarixində ən yaddaqalan hadisələrdən biri kimi dəyərləndirib”.
H.Həmzəoğlunun fikrincə, ABŞ-da keçirilmiş Sammit Azərbaycanın, onun liderinin diplomatik və siyasi sahələrdə növbəti parlaq uğuru olub, ölkənin beynəlxalq münasibətlərdə çəkisini artırmaqla yanaşı, Bakının regional liderliyini də möhkəmləndirib. Türkiyə universitetinin müəllimi vurğulayıb ki, Azərbaycanın Cənubi Qafqazda sülh gündəliyinin formalaşdırılması istiqamətində göstərdiyi səylərdəki əsas rolu ABŞ-da da tanınır.
“Ağ Ev rəhbərinin 907-ci düzəlişlə bağlı qərarı simvolik və tarixi əhəmiyyət daşıyır. ABŞ Konqresi bu düzəlişi hələlik rəsmi şəkildə ləğv etməsə də, Donald Trampın bu məsələ ilə bağlı qərarı Azərbaycanın regionda artan rolunun təsdiqidir”, – deyə o bildirib.
Ekspert Prezident İlham Əliyevin müsahibəsində toxunduğu digər mühüm məqam kimi Bakı ilə Pekin arasındakı münasibətləri göstərərək, iki ölkənin iqtisadi və digər sahələrdə, o cümlədən infrastruktur təşəbbüslərinin həyata keçirilməsində əməkdaşlığına diqqət çəkib: “Şərqlə Qərbin kəsişməsində yerləşən Azərbaycan nəqliyyat layihələrində həlledici rol oynayır. Eyni zamanda, Zəngəzur dəhlizi Azərbaycanın regional nəqliyyat əlaqələrinin qurulmasında əsas oyunçu kimi rolunu nümayiş etdirir”, – deyə o bildirib və Orta Dəhlizin Türkiyə üçün də prioritet olduğunu vurğulayıb.
Ekspert daha sonra rəsmi Bakının Türk dünyasında əlaqələrin möhkəmləndirilməsindəki roluna dair fikirlərini bölüşüb. Onun qənaətinə görə, türk dövlətlərinin müdafiə sahəsində əməkdaşlığı Türk Dövlətləri Təşkilatı məkanında gələcək dialoqun gündəliyinin tərkib hissəsinə çevrilməlidir.
“Geosiyasi qeyri-müəyyənlik şəraitində türk dövlətləri arasında müdafiə sahəsində əməkdaşlıq həyati əhəmiyyət daşıyır. Bu baxımdan birgə təlimlərin keçirilməsi və hərbi-sənaye kompleksi sahəsində əməkdaşlıq mexanizmlərinin inkişafı aktuallıq kəsb edir”, – deyə X.Həmzəoğlu qeyd edib.
Sonda Türkiyə universitetinin müəllimi Prezident İlham Əliyevin rəhbərliyi ilə respublikanın daha iki mühüm nailiyyətini – səkkiz inkişaf etməkdə olan ölkənin İqtisadi Əməkdaşlıq Təşkilatının (D-8) nüfuzunun möhkəmləndirilməsinə verdiyi töhfəni və Azərbaycanın Mərkəzi Asiya dövlət başçılarının Məşvərət Görüşlərinin tamhüquqlu üzvü seçilməsini xüsusi qeyd edib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
