Türkiyə-Macarıstan strateji əlaqələri sürətlə genişlənir
Ankara, 12 noyabr, AZƏRTAC
Macarıstanın Baş naziri Viktor Orban Türkiyəyə səfər edib. Ankarada Prezident Rəcəb Tayyib Ərdoğan ilə Macarıstanın Baş naziri Viktor Orban arasında keçirilən görüşdən sonra əməkdaşlıq əlaqələri ilə bağlı bir sıra mühüm sənədlər imzalanıb, tərəflər birgə mətbuat bəyanatı ilə çıxış ediblər.
AZƏRTAC xəbər verir ki, Türkiyə-Macarıstan strateji əlaqələrinin inkişaf dinamikasına dair vəziyyəti yüksək dəyərləndirən Prezident Rəcəb Tayyib Ərdoğan ali qonağın noyabrın 12-də İstanbulda keçiriləcək Türkdilli Dövlətlərin Əməkdaşlıq Şurasının VIII Zirvə Görüşünə qatılacağını söyləyib. 2018-ci ildən Türk Şurasının müşahidəçi üzvü olan Macarıstan təşkilatın Avropadakı təmsilçiliyinə ev sahibliyi etməkdir. Türkiyə ilə Macarıstan arasında ticarət dövriyyəsi, sərmayə qoyuluşu, o cümlədən mədəni sahədə əlaqələr tərəflərin maraqlarını təmin edir. Dövlət başçısı vurğulayıb ki, 2024-cü il “Türkiyə-Macarıstan Mədəniyyət İli” olaraq qeyd ediləcək.
İki ölkə arasında əlaqələrin əhatə dairəsi və mahiyyətindən məmnunluğunu ifadə edən Baş nazir Viktor Orban vurğulayıb ki, qaçqınlar məsələsində Avropa İttifaqı Türkiyəyə daha yüksək miqdarda dəstək verməlidir.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
