Türkiyə Superliqası: “Qalatasaray” qələbə seriyasını davam etdirib
Bakı, 12 yanvar, AZƏRTAC
Futbol üzrə Türkiyə Superliqasında XIX turun növbəti oyunları keçirilib.
AZƏRTAC xəbər verir ki, günün mərkəzi qarşılaşmasında “Qalatasaray” səfərdə “Başakşəhər”lə üz-üzə gəlib. Görüş İstanbul nəhənginin 2:1 hesablı qələbəsi ilə yekunlaşıb.
Bununla da Okan Burukun baş məşqçisi olduğu komanda bu mövsüm məğlubiyyətsizlik seriyasını 23 matça çatdırıb. Bu nəticədən sonra aktivində 50 xal olan "Qalatasaray" liderliyini möhkəmlədib, 26 xalı olan "Başakşəhər" isə 7-ci pillədə qərarlaşıb.
Günün digər qarşılaşmalarında "Trabzonspor" "Antalyaspor"un qapısından 5, "Qaziantep" "Adana Demirspor"un qapısından 1 cavabsız top keçirib, "Sivasspor" isə "Alanyaspor" ilə 1:1 hesablı heç-heçə edib.
Qeyd edək ki, tura yanvarın 13-də yekun vurulacaq.
Bölmənin digər xəbərləri
