TÜRKİYƏ YERİN İLK MİLLİ SÜNİ PEYKİNİ HAZIRLAMAĞA BAŞLAMIŞDIR
OŞTU-nun rektoru Ural Ağbulud bildirmişdir ki, Türkiyə alimləri özlərinin Yerin süni peykini yaratmaq işlərinə, əslində, boş yerdən başlamışlar və o, tamamilə milli peyk olacaqdır. Bunun zəruriliyi, ilk növbədə, ölkənin təhlükəsizliyinin və iqtisadi inkişafının təmin edilməsindən irəli gəlir.
Alim demişdir ki, başqa ölkələrdən alınan kosmik texnologiyalardan, elektron cihazlarından hərbi məqsədlərlə istifadə olunması ölkənin bütün müdafiə sisteminə xaricdən nəzarət edilməsinə imkan verir. İraqda məhz bu cür vəziyyət yaranmışdı. İraq hərbi hava qüvvələrinin təyyarələri havaya qalxa bilməmiş, hava hücumundan müdafiə sistemi isə sıradan çıxarılmışdır. Bütün bunlar ona görə baş vermişdir ki, İraqın müasir kosmik texnologiyaları yox idi, olan radiolokasiya stansiyalarına isə xarici dövlətlər tam nəzarət edirdilər.
Ural Ağbulud bildirmişdir ki, Türkiyənin öz qüvvəsi ilə yaratdığı telekommunikasiya, meteorologiya və digər mülki təyinatlı peyklər ölkənin təbii ehtiyatlarından tez bir zamanda bəhrələnməyə, etibarlı rabitəni təmin etməyə, təbii kataklizmləri öncədən müəyyənləşdirməyə imkan verəcəkdir. Bütün bunlar milli iqtisadiyyatın inkişafına müsbət təsir göstərəcəkdir.
OŞTU-nun rektoru demişdir ki, Yerin ilk türk süni peyki yaxın 10 ildə buraxılacaq, 15-20 ildən sonra isə kosmosda türk kosmonavtı da ola biləcəkdir.
