TYAN-ŞAN DAĞLARINDAKI ZİRVƏLƏRİN BİRİNƏ ÇİNGİZ AYTMATOVUN ADI VERİLƏCƏKDIR
AZƏRTAC Rusiya mətbuatına istinadla xəbər verir ki, Qırğızıstan hökuməti Tyan-Şan dağlarındakı adsız zirvələrdən birinə dünya ədəbiyyatının klassiki Çingiz Aytmatovun adını vermək niyyətindədir. Bu barədə jurnalistlərə Qırğızıstanın Talas vilayəti qubernatorunun müavini Baktıgul Saparbayeva məlumat vermişdir.
Onun sözlərinə görə, Talas vilayətinin ərazisindəki Ala-Too dağında yerləşən və hündürlüyü 3 min metrdən çox olan adsız zirvəyə Qırğızıstanın xalq yazıçısı, bu il iyunun 10-da ömrünün 80-ci ilində vəfat etmiş Çingiz Aytmatovun adı veriləcəkdir.
Bundan əlavə, vilayətin qubernatoru Qırğızıstanın Təhsil və Elm Nazirliyinə məktubla müraciət edərək, Talas Dövlət Universitetinə yazıçının adının verilməsini təklif etmişdir.
YUNESKO-nun məlumatına görə, Lenin mükafatı laureatı Aytmatov əsərləri dünyada ən çox oxunan müasir yazıçılardan biridir. O, “İlk müəllim”, “Ağ gəmi”, “Edam kötüyü” və başqa fəlsəfi roman və povestlərin müəllifi kimi bütün dünyada məşhurlaşmışdır. Əsərləri 170 dilə tərcümə edilmiş, dünyanın 100-dən çox ölkəsində 60 milyon nüsxədən artıq tirajla çap edilmişdir. Çingiz Aytmatovun “Əbədi gəlin” adlı son romanı 2006-cı ildə çapdan çıxmışdır.
Bölmənin digər xəbərləri
