“Tyson Foods” minlərlə kiloqram dondurulmuş toyuq kotletini geri çağırıb
Vaşinqton, 17 avqust, AZƏRTAC
“Tyson Foods. Inc” şirkəti təqribən 14 min kiloqram dondurulmuş toyuq kotletini bu məhsullarda kənar qatışığın ola biləcəyindən ehtiyat etdiyinə görə geri çağırıb.
AZƏRTAC Amerika KİV-lərinə istinadla xəbər verir ki, şirkətin məlumatına görə, korlanmış məhsul Missuri, Massaçusets, Konnektikut, Nyu-Hempşir, Nyu-York, Vermont, Ohayo, Pensilvaniya, Texas və Vircinya ştatlarında satılıb.
ABŞ Kənd Təsərrüfatı Nazirliyi nəzdində Qida Təhlükəsizliyi Xidmətinin məlumatında deyilir ki, geri çağırılan məhsula 2019-cu il yanvarın 31-də istehsal edilmiş və saxlama müddəti 2020-ci il yanvarın 31-nə qədər olan yarım kiloqramlıq “Weaver” toyuq kotletləri paketləri aiddir. Xidmətin nümayəndələri bildiriblər ki, onlar kotletlərdə kənar qatışığın olması barədə istehlakçılardan şikayət məktubları daxil olandan sonra məlumatlandırılıblar. Xidmət alıcılara bu məhsulları tullamağı, yaxud mağazalara qaytarmağı məsləhət görüb.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
