Bakı, 10 may, AZƏRTAC

Azərbaycan dövlətinin qurucusu, görkəmli siyasi və dövlət xadimi Ümummilli Lider Heydər Əliyevin anadan olmasının 100 illiyi münasibətilə Azərbaycanın Qətərdəki səfirliyinin təşəbbüsü və Qətər Dövlətinin Bələdiyyə Nazirliyinin dəstəyi ilə Doha şəhərində ağacəkmə aksiyası təşkil olunub.

Səfirlikdən AZƏRTAC-a bildirilib ki, Dohanın mərkəzi hissəsində yeni salınan parkların birində təşkil edilən aksiyada yerli iqlim şəraitinə uyğunlaşdırılmış 100 ədəd ağac əkilib.

Tədbirdə Qətərin Bələdiyyə Nazirliyinin Parklar Baş İdarəsinin rəisi və “Qatar EXPO 2023”ün Baş katibi Məhəmməd Ali Al Xori, Doha şəhər bələdiyyəsinin xüsusi nümayəndəsi, Qətərin Ekologiya Nazirliyinin nümayəndələri, tədbirin keçirildiyi parkın yerləşdiyi ərazinin Bələdiyyəsinin rəisi, Qətərdə akkreditə olunan ölkələrin səfirləri, həmçinin Kosta-Rika, Tayland, Gürcüstan, İndoneziya və Rusiyanın müvəqqəti işlər vəkili və müşavirləri, Azərbaycan səfirliyinin diplomatik heyəti, Qətərin yerli ərəbdilli orta məktəblərindən birinin şagird və müəllim heyəti, Qətərdə yaşayan Azərbaycan icmasının nümayəndələri iştirak ediblər.

Qətərdəki Türkiyə səfirliyinin böyük diplomatik heyəti, o cümlədən Qətərdə yerləşən Türkiyə hərbi bazasının komandanı və hərbi hava qüvvələri baş komandanlığı da tədbirə qatılıblar.

Əvvəlcə qətərli məktəblilərin ifasında Azərbaycanın və Qətərin Dövlət himnləri səsləndirilib.

Sonra çıxış edən Azərbaycanın Qətərdəki səfiri Mahir Əliyev tədbir iştirakçılarını salamlayıb. O, Qətərdə həyata keçirilən “10 milyon ağac əkilməsi” təşəbbüsü ilə həmrəylik olaraq səfirlik tərəfindən Ümummilli Liderin 100 illik yubileyi ərəfəsində onun xatirəsinin əbədiləşdirilməsi məqsədilə Dohada 100 ağacın əkilməsi təşəbbüsünün irəli sürdüyünü diqqətə çatdırıb. Diplomat bu ideyanı dəstəklədiyinə və layihənin həyata keçirilməsində səfirliyə dəstəyə görə Qətər tərəfinə, xüsusilə Qətər Dövlətinin Bələdiyyə Nazirliyinin rəhbərliyinə minnətdarlığını bildirib.

Səfir Ümummilli Lider Heydər Əliyevin dövlət xadimi və dahi şəxsiyyət kimi müasir Azərbaycanın qurulmasında əvəzsiz rolundan danışıb.

M.Əliyev yeni salınan parkın yaşıllaşdırılmasına digər səfirliklərin də qoşulmasını və gələcəkdə bu parkın “Xalqlar dostluğu parkı” adlandırılmasını təklif edib.

Qətərin Bələdiyyə Nazirliyinin Parklar Baş İdarəsinin rəisi Məhəmməd Ali Al Xori çıxışında ölkə rəhbərliyi tərəfindən Qətərdə “10 milyon ağac əkək” təşəbbüsünə start verildiyini qeyd edib. Bu xüsusda, Azərbaycan səfirliyinin ilk xarici ölkə diplomatik nümayəndəliyi olaraq Azərbaycanın Ümummilli Liderinin yubileyi ilə əlaqədar 100 ağacın əkilməsi aksiyasının təqdirəlayiq olduğunu bildirib.

Məhəmməd Ali Al Xori Azərbaycan səfirinin təşəbbüsünü alqışlayıb və bunun reallaşması üçün ölkə rəhbərliyinə xüsusi məruzə olunacağını vurğulayıb.

Daha sonra Ümummilli Liderin yubileyi ilə əlaqədar səfirlik tərəfindən xüsusi hazırlanmış xatirə hədiyyələri və Heydər Əliyevin şəkli əks olunan döş nişanları qonaqlara təqdim olunub.

Rəsmi hissədən sonra bütün iştirakçılar ağacəkmə mərasiminə dəvət olunub və bu ideyanın reallaşmasına öz töhfələrini veriblər. Aksiyada qətərli məktəblilər xüsusi fəallıqları ilə seçiliblər.

Tədbir çərçivəsində səfir M.Əliyev “Qatar TV”, “Rayyan TV”, “Al Arabi TV” telekanallarına və “Peninsula” qəzetinə müsahibə verib.

Tədbir yerli KİV-lər, o cümlədən yerli “Qatar TV”, “Rayyan TV”, “AL Kaas TV, CNBC”, “Al Arabi TV” , həmçinin Qətər Xəbərlər Agentliyi (QNA), ingilisdilli “Peninsula” və “Gulf Times” qəzetləri tərəfindən işıqlandırılıb.