Uşaq Evinin rəhbəri: Uşaqlar üçün keçirilən tədbirlər onlarda xoşbəxtlik və özünəinam hissi yaradır
Bakı, 1 iyun, AZƏRTAC
Uşaqlar üçün təşkil edilən tədbirlər onların sosiallaşmasını təşviq edir, ünsiyyət bacarıqlarını inkişaf etdirir və özünəinam hissi yaradır.
Bakıdakı 3 nömrəli Uşaq Evinin direktoru Günay Manafova bu barədə AZƏRTAC-ın müxbirinə “Sea Breeze” ərazisindəki “Event Hall”da Uşaqların Beynəlxalq Müdafiəsi Gününə həsr olunmuş tədbirdə bildirib.
Onun sözlərinə görə, bu qəbildən olan təşəbbüslər uşaqların hərtərəfli inkişafına müsbət təsir göstərir, onların daha xoşbəxt böyüməsi, potensiallarını kəşf etməsi və gələcəkdə cəmiyyətin layiqli üzvləri olması üçün şərait yaradır.
G. Manafova vurğulayıb ki, uşaqların müxtəlif sosial və mədəni proqramlarda iştirakı aqressivliyin azalmasına, özünüifadə bacarıqlarının inkişafına və özünəinamın artmasına kömək edir.
“Uşaqlar özünümüdafiə və özünüifadə bacarıqlarını inkişaf etdirirlər. Onlar, həmçinin komandada işləməyi, bir-biri ilə ünsiyyət qurmağı və özlərini cəmiyyətin bir hissəsi kimi hiss etməyi öyrənirlər”, - deyə sosial müəssisənin direktoru bildirib.
O əlavə edib ki, tədbirdə valideyn himayəsindən məhrum uşaqlar, yetimlər, şəhid ailələrindən və aztəminatlı ailələrdən olan azyaşlılar iştirak ediblər. G. Manafova qeyd edib ki, hər bir uşağın təbəssümü cəmiyyət üçün mühüm dəyərdir.
Bölmənin digər xəbərləri
