Xaçmaz, 21 aprel, Elxan Yusifli, AZƏRTAC

Ümummilli Lider Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkil etdiyi Uşaq İncəsənət Festivalının birinci mərhələsində şimal bölgəsindən bu günədək 1600-dən çox istedadlı uşaq iştirak edib.

AZƏRTAC-ın bölgə müxbiri xəbər verir ki, festivalda Xaçmaz Regional Mədəniyyət İdarəsinin əhatə etdiyi Xaçmaz, Qusar, Quba, Şabran və Siyəzən rayonlarında yaşayan uşaqların çıxışlarını bölgənin peşəkar incəsənət ustalarından ibarət münsiflər heyəti qiymətləndirir.

Şimal bölgəsindən olan istedadlı uşaqlar iki ay ərzində festivalın seçim turlarında iştirak edə biləcəklər.

Respublikanın bütün şəhər və rayonlarını əhatə edən festivalın keçirilməsində əsas məqsəd Ümummilli Lider Heydər Əliyevin mədəniyyətə, uşaq, yeniyetmə və gənclərin incəsənət bacarıqlarının artırılmasına qayğısını rəhbər tutaraq, milli mədəniyyətin və incəsənətin təbliği, uşaqların milli vətənpərvərlik, incəsənətə, milli adət-ənənələrimizə hörmət ruhunda tərbiyə edilməsi, onlarda mədəni həyat tərzinin formalaşdırılmasına köməyin göstərilməsidir.