UŞAQLAR BAĞÇA İLƏ VİDALAŞIRLAR
Sumqayıtlılar hər il iyunun 1-də qeyd edilən Beynəlxalq uşaqları müdafiə gününə həsr edilmiş bayramda özlərini sevincli, fərəhli uşaqlıq dünyasında hiss edirlər. Bu il də belə oldu. Həmin gün Səməd Vurğun adına Mədəniyyət sarayı şəhərin məktəbəqədər tərbiyə müəssisələrinə gedən uşaqların sərəncamına verilmişdi.
AZƏRTAC-ın müxbiri xəbər verir ki, bayram şənliyinin qonaqları arasında şəhər icra hakimiyyətinin, təhsil şöbəsinin nümayəndələri, valideynlər vardı. Qonaqlar sarayın foyesinə daxil olan kimi uşaqların yaradıcılıq aləminə düşürdülər. Məktəbəqədər tərbiyə müəssisələrinn “məzunları” öz əlləri ilə düzəltdikləri oyuncaqları, ikebana və rəsmləri həvəslə təqdim edirdilər.
Şəhərin uşaq bağçalarının yetirmələrinin böyük və maraqlı konsert proqramı bayram şənliyinə gələnlərin ciddi marağına səbəb oldu. Oynaq rəqslər, şən mahnılar, şux zarafatlar, uşaqların söylədiyi şeirlər böyüməkdə olan nəslin istedadından xəbər verirdi.
“Əlvida, uşaq bağçamız” şousu başa çatandan sonra da sarayın salonunda gülüş səsləri, alqış sədaları eşidilirdi. Bu, Azərbaycanın xoşbəxt gələcəyinin səsi idi.
######
 |
 |
