Uşaqların Beynəlxalq Müdafiəsi Günü Marneulidə geniş qeyd olunub Fotoreportaj
Tbilisi, 1 iyun, AZƏRTAC
1 İyun - Uşaqların Beynəlxalq Müdafiəsi Günü Marneulidə geniş qeyd olunub.
Marneulidəki “Azərbaycan Evi”nin və Gürcüstan Azərbaycanlılarının İnteqrasiya Mərkəzinin (GAİM) təşkilatçılığı ilə 1 İyun – Uşaqların Beynəlxalq Müdafiəsi Günü münasibətilə bayram tədbiri keçirilib.
AZƏRTAC xəbər verir ki, tədbir çərçivəsində GAİM-in rəsm müəllimi tanınmış rəssam Xəyalə Mustafayevanın "Körpə qalan ruhum" adlı rəsm əsərlərindən ibarət sərgisi açılıb.
Tədbirdə Marneuli, Bolnisi, Qardabani və Dmanisidən olan balaca fidanlar, onların valideynləri, ictimaiyyət nümayəndələri iştirak ediblər.
“Azərbaycan Evi”nin və GAİM-in direktoru Məhəbbət İmanov tədbiri açaraq Uşaqların Beynəlxalq Müdafiəsi Gününün əhəmiyyətindən danışıb.
Bildirib ki, bu cür tədbirlər uşaqların yaradıcılıq potensialının inkişafına, milli-mədəni dəyərlərin təbliğinə və gənc nəslin incəsənətə marağının artırılmasına mühüm töhfə verir.
Rəssam Xəyalə Mustafayeva sərgidə nümayiş olunan əsərlər haqqında məlumat verərək bildirib ki, bu sərgini digər sərgilərdən fərqləndirən əsas xüsusiyyət onun uşaqlara həsr olunmasıdır. O, uşaqların yaradıcılıq fəaliyyətinə göstərilən diqqətin vacibliyini xüsusi vurğulayıb.
Sonra Gürcüstan parlamentinin sabiq deputatı Ramiz Bəkirov, Gürcüstan Azərbaycanlıları Konqresinin sədri Hüseyn Yusibov, Qardabani Təhsil və İnteqrasiya Mərkəzinin müəlliməsi Sevda Şahverdiyeva, Gürcüstanda Azərbaycanlı Müəllimlər İttifaqının sədri Səadət Zeynalqızı, Gürcüstan Azərbaycanlılarının Jurnalistlər Birliyinin sədri Nizami Məmmədzadə, gürcü dili və ədəbiyyatı müəlliməsi Lia Xaraişvili və başqaları çıxış edərək uşaqların hərtərəfli inkişafında təhsil, mədəniyyət və incəsənətin mühüm rolundan danışıblar.
Tədbir çərçivəsində GAİM-in nəzdində Cəmilə Məmmədovanın bədii rəhbərliyi ilə fəaliyyət göstərən “Sarvan” Folklor Ansamblının şagirdləri Azərbaycan və gürcü milli rəqslərini təqdim ediblər.
Bayram proqramı çərçivəsində uşaqlar üçün müxtəlif rəsm müsabiqələri və əyləncəli proqramlar təşkil olunub. Balacalar gün ərzində həm yaradıcılıq fəaliyyətlərində iştirak edib, həm də maraqlı oyunlar və əyləncələrlə xoş vaxt keçiriblər.
Gürcü dili müəlliməsi Anna Allahverdovanın rəhbərliyi altında musiqi nömrələri təqdim olunub.
Bölmənin digər xəbərləri
