ÜST: Hər iki saniyədə 70 yaşınadək bir insan qeyri-yoluxucu xəstəliklərdən dünyasını dəyişir
Bakı, 22 sentyabr, AZƏRTAC
Ürək xəstəliklərindən başlayaraq xərçəng və şəkərli diabetə qədər qeyri-yoluxucu xəstəliklər dünyada aparıcı ölüm səbəbləri qismində yoluxucu xəstəlikləri ötüb keçib. AZƏRTAC xəbər verir ki, bu barədə Ümumdünya Səhiyyə Təşkilatının (ÜST) yeni məruzəsində deyilir.
Məruzə və yeni informasiya portalı Baş Assambleyanın 77-ci sessiyası çərçivəsində ÜST-nin “Bloomberg Philanthropies” ilə birgə təşkil etdiyi tədbirdə təqdim edilib. ÜST-nin məlumatına görə, qeyri-yoluxucu xəstəliklər bu yüzillikdə səhiyyə və inkişafın ən ciddi problemlərindən biridir. Hər iki saniyədə 70 yaşınadək bir insan qeyri-yoluxucu xəstəliklərdən dünyasını dəyişir.
Əsas qeyri-yoluxucu xəstəliklərə ürək xəstəlikləri və insult kimi ürək-damar xəstəlikləri, eləcə də xərçəng, şəkərli diabet, xroniki respirator xəstəliklər və ruhi xəstəliklər daxildir. Onlar birlikdə hər il 41 milyon insan həyatına son qoyur və dünyada ölüm hallarının təxminən dörddə üçünü təşkil edirlər.
Məruzədə bütün dünyada tətbiq edilə bilən, bu göstəriciləri aşağı sala bilən, insan həyatını xilas edə bilən və pula qənaət edə bilən iqtisadi nöqteyi-nəzərdən səmərəli tədbirlər təqdim edilib.
“Bu məruzə qeyri-yoluxucu xəstəliklərin və müvafiq risk amillərinin yaratdığı təhlükənin həqiqi miqyası barədə xatırlatmadır”, - deyə ÜST-nin baş direktoru Tedros Qebreyesus bildirib.
Yeni informasiya portalında 194 ölkədə qeyri-yoluxucu xəstəliklər üzrə konkret ölkələr, risk amili və siyasət amili üzrə son məlumatlar təqdim edilib.
Portal siqaret çəkmək, qeyri-sağlam qidalanma, alkoqolun zərərli istifadəsi və fiziki aktivlik çatışmazlığını ehtiva edən risk amilləri ilə birlikdə ürək-damar xəstəlikləri, xərçəng, şəkərli diabet və xroniki respirator xəstəliklər üzrə məlumatları tədqiq etməyə imkan verir.
Portal müxtəlif ölkələrdə qanunauyğunluq və tendensiyaları aşkar edir və ölkələr və regionlar arasında müqayisə aparmağa imkan verir.
Bu günə olan məlumata görə, yalnız bir neçə ölkə 2030-cu ilə qədər qeyri-yoluxucu xəstəliklərdən erkən ölüm hallarının üçdə bir azalmasını nəzərdə tutan Dayanıqlı İnkişaf Məqsədlərindən (DİM) birinə nail olmaqdadır.
Bölmənin digər xəbərləri
