CƏMİYYƏT
ÜST: “omikron” barədə yanlış məlumatların yayılması yoluxma hallarının artmasına səbəb olur
Bakı, 17 mart, AZƏRTAC
Ümumdünya Səhiyyə Təşkilatı (ÜST) xəbərdarlıq edir ki, “omikron”un COVID-19-un son variantı olduğu və guya pandemiyanın sona çatması barədə şəbəkədə sürətlə yayılan məlumatlar həqiqətə uyğun deyil. AZƏRTAC bildirir ki, bu barədə BMT-nin “Xəbərlər” xidmətinin məlumatında deyilir.
“Yoluxma hallarında bir neçə həftəlik qlobal azalmadan sonra COVID-19-a qeydə alınmış yoluxma hallarının sayı bütün dünyada, xüsusilə də Asiyanın bəzi yerlərində yenə artır”, - deyə Ümumdünya Səhiyyə Təşkilatının baş direktoru Tedros Qebreyesus Cenevrədə jurnalistlərə bildirib. Onun sözlərinə görə, keçən həftə ÜST COVID-19-a yoluxma hallarının aşkar edilməsində 8 faizlik artım qeydə alıb - 11 milyondan çox müsbət test.
“Bəzi ölkələrdə testlərin aparılmasında azalmaya baxmayaraq, biz yoluxma hallarında artım müşahidə edirik. Bu o deməkdir ki, müşahidə etdiyimiz hallar - “aysberqin yalnız görünən hissəsidir”, - deyə doktor Tedros Qebreyesus bəyan edib.
ÜST-ün təmsilçisi, doktor Mariya Van Kerkhove bildirib ki, bütün dünyada yoluxma hallarında artıma bir neçə amilin birləşməsi səbəb olub. “İlkin “omikron” ştamı bütün dünyada yayılmaqda davam edir, - deyə o xəbərdarlıq edir. - Bundan başqa onun yeni - BA.1 və BA.2 variantları da peyda olub. Bunlardan BA.2 daha yoluxucudur. Bu, SARS-COV2 virusunun bu günə qədər gördüyümüz variantlarından ən yoluxucusudur”.
BA.2 ştamı əvvəlki variantlarla müqayisədə daha ağır simptomlara və nəticələrə səbəb olmur, lakin onun səbəb olduğu xəstəxanaya yerləşdirmə hallarının sayı əksər ölkələrdə artır.
“Omikron”un yumşaq və zərərsiz olduğu barədə yanlış məlumat istənilən pozitiv xəbərlərə inanmağa hazır olan insanları çaşdırır.
Xəstəliyin artmasına təsir edən digər amil bir çox dövlətlər tərəfindən tibbi-sanitariya və sosial məhdudiyyətlərin ləğvi oldu. "Məcburi maska taxmaqdan və fiziki məsafədən imtina edilməsi virusun maneəsiz yayılmasına imkan verir", - deyə doktor Van Kerkhove xəbərdarlıq edib.
Ekspert qeyd edib ki, insanlar arasında çaşqınlıq yaradan “külli miqdarda dezinformasiya” peyda olur. "Omikron”un yumşaq və zərərsiz olması, bunun koronavirusun son versiyası olması, pandemiyanın bitdiyi barədə yanlış məlumatlar istənilən müsbət xəbəri eşitməyə və inanmağa hazır olanları çaşdırır", - deyə o bildirib.
ÜST-nin səhiyyə sahəsində fövqəladə hallar proqramının icraçı direktoru, doktor Mayk Rayan bildirib ki, virusun "sakitləşdiyi" və yalnız sırf mövsümi və proqnozlaşdırıla bilən şəkildə yenidən görünməyə davam edəcəyinə dair indiyə qədər heç bir dəlil yoxdur. Ekspertin fikrincə, koronavirus hələ də təhlükəlidir və əhalinin immunitetinin zəifləməsi və vaksinlərin zəif effektivliyi fonunda asanlıqla yayıla bilər.
“Virus immunitetin zəiflədiyi bölgələrə keçəcək”, - deyə doktor Mayk Rayan bildirib. - O, bir neçə ay belə regionların birində “gizlənəcək”. Çoxlu viruslar, o cümlədən poliomielit belə işləyir: onlar müəyyən bir cəmiyyətdə sabitləşir və bir müddət sonra digərinə sürətlə yayılır.
Həkimlər peyvəndin vacibliyini bir daha vurğulayırlar, çünki ölüm hallarının əksəriyyəti peyvənd olunmamış, yaşlı və effektiv vaksinlərin tam kursunu almamış və yanaşı xəstəlikləri olan insanlarda təsadüf edir.
“Biz hər bir ölkədə peyvəndin əhəmiyyəti haqqında təkrar-təkrar danışmalıyıq”, - deyə doktor Mayk Rayan bildirib. "Ekspertlər ən həssas qrupların peyvənd nisbətlərini yenidən qiymətləndirməli və səlahiyyətlilər hər bir həssas insanın ən azı iki doza effektiv peyvənd almasını təmin etməlidirlər."
Doktor Van Kerkhove xatırladıb ki, COVID-19-a qarşı vaksinlər ciddi xəstəliklərin və ölümün qarşısını almaqda "inanılmaz dərəcədə" effektiv olaraq qalır. Bundan əlavə, onun sözlərinə görə, dünyanın virusun necə inkişaf etdiyini bilmək üçün etibarlı bir COVID-19 nəzarət sisteminə ehtiyacı var. "Qarşılaşdığımız çətinliklərə baxmayaraq, biz hələ də sınaq proqramlarını davam etdirməliyik", - deyə ÜST eksperti vurğulayıb.