VANKUVER OLİMPİADASI POZULMA TƏHLÜKƏSİ QARŞISINDADIR
Bakı, 12 yanvar (AZƏRTAC). Fevralın 12-də Kanadanın Vankuver şəhərində start götürəcək 2010-cu il Qış Olimpiya oyunları pozulma təhlükəsi qarşısındadır. Məsələ burasındadır ki, dörd ildən bir keçirilən bu mötəbər yarışı qəbul etməyə hazır olan dağ-xizək kurortunu leysan yağışlar bürümüşdür.
Düz bir ay sonra Vankuverin “Bi-Si Pleys” stadionunda XXI Qış Olimpiya oyunlarının təntənəli açılış mərasimi olacaqdır. Lakin 2010-cu il Oyunları paytaxtının dağlıq hissəsində güclü leysan yağır. Fristayl və snoybord üzrə Olimpiya yarışlarına hazırlaşan qarlı kurort müvəqqəti olaraq bağlanmışdır. Beynəlxalq Olimpiya Komitəsinin nümayəndələri yaranmış vəziyyətə görə narahatdırlar. Axı, yarışların başlanmasına cəmi bir ay qalır.
Ötən qış eyni problemə görə, nəhəng slalomda qar örtüyünün çox yumşaq olması səbəbindən kişilər və qadınlar arasında dünya kuboku mərhələsini ləğv etməyə məcbur olmuşlar. Vankuver Olimpiadasının təşkilat komitəsi isə əmindir ki, iqlim şəraiti fevralın 12-dən 28-dək keçiriləcək yarışlara mane ola bilməyəcəkdir.
Bölmənin digər xəbərləri
