VARŞAVADA “AZƏRBAYCAN GECƏSİ” KEÇİRİLMİŞDİR
Tədbir ölkəmiz haqqında sənədli filmin nümayişi ilə başlamışdır. Novruz bayramına dair rəngli slaydların göstərildiyi gecənin iştirakçıları hazırda Varşavada təhsil alan həvəskar fotoqraf Həbib İbadullayevin ölkəmiz haqqındakı fotoşəkillərindən ibarət sərgiyə baxmışlar.
Varşava Universitetinin professoru Marçin Vieçorka Qobustana səyahəti və oradakı qaya təsvirlərilə bağlı təəssüratlarını bölüşmüşdür. 200 nəfərdən çox qonağın iştirak etdiyi tədbirdə milli mətbəximizin təamlarından və Novruz şirniyyatından ibarət süfrə açılmış, klassik və müasir Azərbaycan musiqisi səsləndirilmiş, rəqslərimiz ifa olunmuşdur.
“Azərbaycan gecəsi”nin informasiya dəstəyini təmin edən Varşavanın məşhur “Caz Radio” klubu öz proqramlarında tədbirlə, habelə Azərbaycanda Novruz şənliklərinin tarixi və ənənələri ilə bağlı dönə-dönə məlumat vermişdir.
Bundan əlavə, martın 22-də Poznan şəhərindəki A.Mitskeviç adına Universitetdə də Novruz bayramı ilə əlaqədar tədbir keçirilmişdir. Tədbirdə universitetin professor-müəllim heyəti, tələbələr, o cümlədən burada yaşayan Azərbaycan icmasının təmsilçiləri iştirak etmişlər.
