Vəkillər Kollegiyasının yeni üzvü: Məsuliyyətli missiyanın daşıyıcısı olmaqdan qürur duyuram
Bakı, 13 may, AZƏRTAC
Dövlət qurumlarında hüquqşünas vəzifəsində işləmişəm. Ən böyük arzum vəkil olmaq idi. Nəhayət, vəkil andı içərək, Azərbaycan Respublikasının Vəkillər Kollegiyasının sıralarına daxil oldum.
Bu fikirləri AZƏRTAC-a açıqlamasında bu gün Vəkillər Kollegiyasına üzv qəbul edilən Sürəyya Həbilova bildirib.
Vəkillik peşəsinə marağının hələ orta məktəbdə oxuyarkən yarandığını deyən Sürəyya Həbilova ən böyük dəstəyi atasından aldığını deyib: “Atam dövlət qulluqçusudur. Hər şeyi ondan öyrənmişəm. Həmişə məni həvəsləndirən ilham mənbəyim olub”.
O, vətəndaşların hüquqlarını müdafiə etmək kimi məsuliyyətli missiyanın daşıyıcısı olmaqdan qürur duyduğunu ifadə edib: “Yüksək bal toplayaraq Hüquq fakültəsinə daxil olmuşam və həmin fakültəni fərqlənmə diplomu ilə bitirmişəm, Prezident təqaüdçüsü olmuşam. Hüquqşünas kimi peşəkarlığımı artırmışam. İndi isə vətəndaşlarımıza, millətimizə daha çox fayda vermək üçün vəkil oldum”,- deyə o qeyd edib.
Xatırladaq ki, bu gün daha 64 nəfər Vəkillər Kollegiyasına üzv qəbul olunub.
Bölmənin digər xəbərləri
