Xaçmaz, 20 iyun, Elxan Yusifli, AZƏRTAC

Xaçmaz rayonunun Palçıqoba kəndində inşa olunan 360 şagird yerlik yeni məktəb binası növbəti tədris ilində istifadəyə veriləcək.

AZƏRTAC-ın bölgə müxbiri xəbər verir ki, Palçıqoba kənd tam orta məktəbinin köhnə binasında 2020-ci ilin iyul ayında yanğın baş verdiyi üçün yeni müasir məktəb binası inşa olunub.

İkimərtəbəli yeni binanın tikintisinə 2023-cü ilin mart ayından başlanılıb. Məktəb binasında hazırda son tamamlama işləri görülür.

Üç korpusdan ibarət yeni məktəb binasında sinif otaqları, laboratoriya, gənclərin çağırışaqədər hazırlığı, əmək təlimi və kompüter otaqları, idman və akt zalı, kitabxana və yeməkxana olacaq.

Dörd il əvvəl Palçıqoba kəndindəki köhnə məktəbin binasında yanğın hadisəsi baş verdikdən sonra şagirdlər təhsillərini qonşu Nərəcan kənd tam orta məktəbində davam etdiriblər.