XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Seniyabrın 12-də Azərbaycan Respublikasının xarici işlər naziri Vilayət Quliyev Çin Xalq Respublikasının ölkəmizdəki Fövqəladə və Səlahiyyətli səfiri Cjan Qotszyanı qəbul etmişdir.
Görüş zamanı səfir Azərbaycanın işğal edilmiş Dağlıq Qarabağ bölgəsində erməni separatçı rejimi tərəfindən “yerli özünüidarə orqanlarına” qondarma seçkilər keçirilməsi ilə bağlı Çin Xalq Respublikasının xarici işlər naziri Tan Tszyasyuanın nazir V.Quliyevə ünvanlanmış və bu “seçkilərə” mənfi münasibət bildirilən məktubunu çatdırmışdır. Məktubda “seçkilərlə” bağlı ÇXR-in mövqeyinin dəyişməz olduğu, Azərbaycanın ərazi bütövlüyünə və suverenliyinə hörmət etdiyi, Dağlıq Qarabağ münaqişəsi barədə BMT Təhlükəsizlik Şurası tərəfindən qəbul edilmiş qətnamələrə tərəfdar çıxdığı qeyd edilmiş və münaqişənin beynəlxalq birliyin birgə səyləri nəticəsində sülh yolu ilə həll edilməsi fikri öz əksini tapmışdır. Bununla yanaşı, Azərbaycan ilə ÇXR arasında əlaqələrin inkişafı və əməkdaşlığın genişlənməsi barədə ətraflı fikir mübadiləsinin aparılması arzusu ifadə edilmişdir.
Nazir V.Quliyev Dağlıq Qarabağ bölgəsində qondarma seçkilərin keçirilməsi ilə bağlı Çin Xalq Respublikası xarici işlər nazirinin mövqeyini yüksək qiymətləndirərək, Çin ilə Azərbaycan arasında hərtərəfli əlaqələrin inkişafına böyük əhəmiyyət verdiyini və dostluq münasibətlərinin möhkəmlənəcəyinə ümidvar olduğunu bildirmişdir.
Bölmənin digər xəbərləri
