Xocalı faciəsinin dünya ictimaiyyətinə çatdırılmasında gənclər daha çox fəallıq göstərməlidir
Masallı, 25 fevral (AZƏRTAC). Fevralın 25-də Masallı Rayon Gənclər Mərkəzində Xocalı faciəsinin iyirmi ikinci ildönümünə həsr olunmuş anım mərasimi keçirilmişdir.
AZƏRTAC xəbər verir ki, mərasimdə çıxış edən Masallı Rayon Gənclər və İdman İdarəsinin rəisi Camal Manafov Xocalı soyqırımını bütün bəşəriyyətə qarşı törədilmiş cinayət adlandıraraq, bu faciənin dünya ictimaiyyətinə çatdırılmasının və bu istiqamətdə gənclərimizin daha çox fəallıq göstərməsinin vacibliyini vurğulamışdır.
Tədbirdə 1988-ci ildən başlanmış Ermənistan-Azərbaycan, Dağlıq Qarabağ münaqişəsi dövründə ən müdhiş, faciəli hadisələrdən biri olan Xocalı soyqırımı barədə ətraflı söhbət açılmışdır. Qeyd olunmuşdur ki, cinayətkar erməni silahlı dəstələri Xocalının 613 sakinini xüsusi qəddarlıqla qətlə yetirmiş, 487 nəfər şikəst olmuş, 1275 dinc sakin-qocalar, uşaqlar, qadınlar əsir götürülərək ağlasığmaz işgəncələrə və təhqirlərə məruz qalmışlar. 150 nəfərin taleyi hələ də məlum deyildir.
Mərasimdə Xocalı həqiqətlərini əks etdirən sənədli film nümayiş olunmuşdur.
Bölmənin digər xəbərləri
