Xocalı faciəsinin ildönümü Səbail rayonunda da geniş qeyd edilir
Bakı, 25 fevral (AZƏRTAC). Xocalı faciəsinin 22-ci ildönümü respublikamızın hər yerində olduğu kimi, Bakı şəhərinin Səbail rayonunda da geniş şəkildə qeyd olunur.
Səbail Rayon İcra Hakimiyyəti tərəfindən hazırlanmış tədbirlər planına uyğun olaraq rayonun idarə və təşkilatlarında, orta və ali məktəblərində faciə ilə bağlı sərgilər və müxtəlif tədbirlər keçirilir, mədəniyyət müəssisələrində qətliamla bağlı xatirə gecələri, foto və rəsm sərgiləri, dəhşətli hadisələrin şahidləri ilə görüşlər, rayonun orta məktəb şagirdləri arasında güllə atıcılığı üzrə yarış təşkil olunmuşdur.
Tədbirlər çərçivəsində fevralın 25-də rayonun orta və ali məktəblərində ilk dərslər Xocalı faciəsinə həsr edilmiş, anım tədbirləri keçirilmişdir. Azərbaycan Dövlət Gənc Tamaşaçılar Teatrında və Badamdar Mədəniyyət Evində faciəyə həsr olunmuş tamaşalara ictimai baxış təşkil olunmuşdur.
Faciənin ildönümü ərəfəsində Azərbaycan Vətən Müharibəsi Veteranları Birliyi Səbail rayon şöbəsinin qərargahında Xocalı şəhərindən köçkün düşərək Səbail rayonda məskunlaşmış 26 ailənin nümayəndələri ilə görüş keçirilmişdir.
Görüşdə çıxış edən Səbail Rayon İcra Hakimiyyətinin başçısı Asif Əsgərov Azərbaycan xalqının qan yaddaşı olan Xocalı faciəsi, ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı həqiqətlərin dünya ictimaiyyətinə çatdırılması istiqamətində görülən işlər barədə ətraflı məlumat vermişdir. Bildirilmişdir ki, bu faciənin dünya ictimaiyyətinə çatdırılmasında Azərbaycan xalqının ümummilli lideri Heydər Əliyevin böyük xidməti olmuşdur. Məhz Ulu Öndərin təşəbbüsü ilə Azərbaycan Respublikasının Milli Məclisində ilk dəfə bu məsələyə siyasi-hüquqi qiymət verilmiş, faciənin dünya ictimaiyyətinin diqqətinə çatdırılması məqsədi ilə işlərə başlanmışdır. Bu işlərin nəticəsidir ki, hər il faciənin ildönümü istər respublikamızda, istərsə də onun hüdudlarından kənarda geniş qeyd olunur, soyqırımı qurbanlarının xatirəsi yad edilir, dünya ictimaiyyətinə ermənilərin iç üzü göstərilir.
Azərbaycan Prezidenti İlham Əliyevin apardığı məqsədyönlü siyasət nəticəsində Xocalının, həmçinin işğal altında olan digər torpaqlarımızın düşməndən azad ediləcəyinə əminlik bildirilmişdir.
Tədbirdə çıxış edən Xocalı Rayon İcra Hakimiyyətinin nümayəndəsi Xəlil Vəliyev və başqaları əminliklə bildirmişlər ki, işğal altında olan torpaqlarımız Prezident, Ali Baş Komandan İlham Əliyevin rəhbərliyi ilə tezliklə düşmən tapdağından azad olunacaqdır.
Səbail rayonunda məskunlaşmış Xocalıdan olan məcburi köçkünlərə rayon icra hakimiyyəti tərəfindən maddi və ərzaq yardımları göstərilmişdir.
Tədbirin sonunda rayon icra hakimiyyətinin başçısı tərəfindən vətəndaşların qəbulu keçirilmişdir.
Bölmənin digər xəbərləri
