Xocalı soyqırımını törədənlər layiqli cəzalarını almalıdırlar
Bakı, 25 fevral (AZƏRTAC). Türkiyənin İstanbul şəhərində, soydaşlarımızın çoxluq təşkil etdiyi Halkalı səmtində Azərbaycanın şəhərdəki baş konsulluğunun təşkilatçılığı ilə Xocalı soyqırımının 22-ci ildönümünə həsr olunmuş tədbir keçirilmişdir.
AZƏRTAC xəbər verir ki, tədbirdə çıxış edən baş konsul Həsən Zeynalov Azərbaycan xalqının erməni şovinistlərinin etnik təmizləmə, soyqırımı siyasətinə məruz qaldığını bildirmişdir. Qeyd etmişdir ki, dünya ictimaiyyəti bu hadisələrə lazımi siyasi-hüquqi qiymət verməli, soyqırımını törədənlər layiqli cəzalarını almalıdırlar.
“Xocaliya ədalət” kampaniyasının Türkiyə üzrə əlaqələndiricisi Elməddin Mehdiyev Dialoq və Əməkdaşlıq uğrunda İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyevanın təşəbbüsü ilə həyata keçirilən kampaniya haqqında məlumat vermişdir. O, minlərlə könüllünün bu kampaniyaya dəstək verdiyini diqqətə çatdıraraq bildirmişdir ki, Xocalı faciəsi 57 üzv ölkəni özündə birləşdirən İslam Əməkdaşlıq Təşkilatı, bir sıra dövlətlər tərəfindən soyqırımı kimi tanınmışdır.
Anım mərasimində iştirak edən Azərbaycan Milli Məclisinin deputatları da Xocalıda xalqımızın başına gətirilən dəhşətli soyqırımı aktına bütün türk dünyasının səssiz qalmamasının vacibliyini vurğulamışlar.
Tədbirin sonunda Xocalı soyqırımından bəhs edilən film nümayiş olunmuşdur.
Bölmənin digər xəbərləri
