Yeni Zelandiyada kütləvi qətl törədən şəxs Baş nazirin ofisinə elektron məktub göndərib
Tokio, 18 mart, AZƏRTAC
Yeni Zelandiyada kütləvi qətl törətməkdə şübhəli bilinən şəxs Baş nazirin ofisinə elektron məktub göndərib.
AZƏRTAC xəbər verir ki, Baş nazir Casinda Ardernin ofisinin yaydığı məlumata görə, martın 15-də elektron poçta Kraystçörç şəhərində kütləvi qətllər törətməkdə şübhəli bilinən şəxsdən onun manifestinin sürəti daxil olub. Daha 70-ə yaxın insanın belə məktub aldığı bildirilir. Bundan əlavə, həmin məktub şübhəli tərəfindən “Twitter” sosial şəbəkəsinə də yerləşdirilib.
Xatırladaq ki, Yeni Zelandiya məhkəməsi Avstraliya vətəndaşı Brenton Tarranta qarşı Kraystçörç şəhərinin iki məscidində 50 nəfərin qətlə yetirilməsi ilə bağlı ittiham irəli sürüb. Sənəddə deyilir ki, şübhəli hücumun hazırlanmasına iki il vaxt sərf edib. Burada miqrantların ağ cəmiyyəti doldurmasından şikayət öz əksini tapıb.
Baş nazirin ofisinin bildirdiyinə görə, həmin sənəd parlamentin sədrinə, digər siyasi xadimlərə və kütləvi informasiya vasitələrinə göndərilib. Həmçinin qeyd edilir ki, elektron məktubda hücum barədə heç bir xəbərdarlıq yoxdur.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
