Yunanıstanda peyvənd olunmayanlara qarşı məhdudiyyətlər tətbiq olunacaq
Afina, 6 noyabr, AZƏRTAC
Yunanıstan Milli Səhiyyə Təşkilatının mətbuat xidməti ölkədə koronavirusa yoluxmaların sayının maksimal həddə - 6,909 nəfərə çatdığını bildirib. Statistikaya görə, bütün dövr ərzində ölkədə koronavirusa yoluxanların ümumi sayı 774 min 265 nəfər olub. Onların 50,7 faizi kişilərdir, yoluxanların orta yaşı 38-dir. Koronavirusdan ölənlərin sayı sutkada 48 nəfər artaraq 16,2 min nəfər təşkil edib, onların orta yaşı 78 təşkil edib.
Yunanıstanın Baş naziri Kiriakos Mitsotakis dördüncü dalğanın başlanğıcı olduğunu bildirib. Onun sözlərinə görə, indi peyvənd var və ona görə də yeni karantin olmayacaq. Əvəzində peyvənd olunmayanlara qarşı məhdudiyyətlər tətbiq ediləcək. Belə ki, noyabrın 6-dan Yunanıstanda peyvənd olunmamış işçilər işə getmək üçün həftədə iki dəfə koronavirus testi üçün pul ödəməlidirlər. Yunanıstan hakimiyyəti vətəndaşları peyvənd olunmağa inandırmaq üçün məlumatlandırma kampaniyaları aparmaq və peyvənd edənlər üçün imtiyazlar tətbiq etməyi təklif edib.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
