Zaqatala Dövlət Təbiət Qoruğunun ərazisində reydlər davam etdirilir
Bakı, 20 sentyabr (AZƏRTAC). Ekologiya və Təbii Sərvətlər Nazirliyinin (ETSN) Zaqatala Dövlət Təbiət Qoruğunun Gərəkli sahəsinin 3, 4, 5 və 6 nömrəli dolaylarında kol-kosdan təmizlənmiş ərazidə aqrotexniki qaydada tərkibində narkotik xassəli maddələr olan çətənə kolunun əkilib-becərilməsi müəyyən edilmişdir.
Nazirliyin mətbuat xidmətindən AZƏRTAC-a bildirmişlər ki, bununla bağlı Balakən Rayon Polis Şöbəsinə məlumat verilmişdir. Eyni zamanda, hadisə yerində saxlanılmış Balakən rayonunun Gərəkli kənd sakini Cavid Dibirov hüquq-mühafizə orqanlarına təhvil verilmişdir.
Xidməti vəzifələrini layiqincə icra etmədiklərinə görə qoruğun mühafizə üzrə direktor müavini, sahə müfəttişi və 6 nəfər mühafizə yegeri tutduqları vəzifədən azad olunmuşlar.
Bu cür halların baş verməsinin qarşısını almaq üçün ETSN tərəfindən hüquq-mühafizə orqanlarına rəsmi məlumat göndərilmişdir.
Zaqatala Dövlət Təbiət Qoruğunun ərazisində reydlər davam etdirilir.
Bölmənin digər xəbərləri
