ZAQATALADA AZƏRBAYCAN XALQ CÜMHURİYYƏTİNİN 90 İLLİYİNƏ HƏSR OLUNMUŞ KONFRANS KEÇİRİLMİŞDİR
AZƏRTAC xəbər verir ki, mayın 27-də Zaqatala şəhərindəki “Qala düzü” istirahət mərkəzində Azərbaycan Xalq Cümhuriyyətinin 90 illiyinə həsr olunmuş elmi-praktik konfrans keçirilmişdir.
Konfrans iştirakçıları əvvəlcə ümummilli liderimiz Heydər Əliyevin adını daşıyan parka gələrək, ulu öndərin abidəsini ziyarət etmiş, önünə gül-çiçək düzmüşlər.
Zaqatala Rayon İcra Hakimiyyəti və Azərbaycan Müəllimlər İnstitutu Zaqatala filialının birgə təşkilatçılığı ilə keçirilən konfransın əvvəlində filial tələbələrinin hazırladıqları ədəbi-bədii kompozisiya nümayiş etdirilmişdir.
Konfransda rayon icra hakimiyyətinin başçısı Asif Əsgərovun “Azərbaycan Xalq Cümhuriyyəti-90. Müstəqilliyin çətin yolu” mövzusunda məruzəsi dinlənilmişdir. Məruzədə qeyd olunmuşdur ki, 90 il bundan əvvəl, 1918-ci il mayın 28-də Azərbaycan xalqının tarixində çox əlamətdar hadisə baş vermişdir. Həmin gün İstiqlal bəyannaməsi qəbul olunmuş, Şərqdə ilk demokratik respublika elan edilmişdir. 28 May günü Azərbaycan xalqının tarixinə parlaq səhifə kimi əbədi daxil olmuşdur. Natiq qeyd etmişdir ki, əsrlər boyu müstəqillik, milli azadlıq həsrətində olan xalqımızın ilk demokratik respublikasının cəmi 23 ay yaşamasına baxmayaraq, onun fəaliyyət dövrü milli dövlətçilik tariximizin ən yaddaqalan mərhələlərindən biri olmuşdur. Ulu öndərimiz Heydər Əliyevin dediyi kimi, cəmi 23 ay yaşamasına baxmayaraq, ilk respublika dövründə həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb etmişdir.
Azərbaycanda ilk demokratik respublikanın yaranmasının xalqımızın milli azadlığa, müstəqilliyə və demokratiyaya olan istək və arzularının, göstərdiyi cəhdlərin məntiqi nəticəsi olduğunu bildirən icra başçısı Azərbaycan Demokratik Respublikasının süqutundan 71 il sonra, 1991-ci ildə xalqımızın yenidən öz istiqlaliyyətinə qovuşduğunu qeyd etmiş, müstəqil Azərbaycan dövlətinin tarixi varisinə sadiq qalaraq, hər il mayın 28-nin ölkəmizdə milli bayram - Respublika günü kimi böyük təntənə ilə qeyd edildiyini xüsusi vurğulamışdır.
Konfransda, həmçinin Azərbaycan Müəllimlər İnstitutu Zaqatala filialının direktoru Tovuz Eminlinin “Var millətimizin imzası bu imzalar içində”, filialın müəllimi Mübariz Hudulovun “Azərbaycanın dövlət müstəqilliyi bizim tarixi nailiyyətimizdir” mövzularında və digər mövzularda məruzələr dinlənilmişdir.
Konfransın sonunda Yeni Azərbaycan Partiyasının sıralarına qəbul olunmuş tələbələrə üzvlük vəsiqələri təqdim edilmişdir.
Bölmənin digər xəbərləri
