Zaqatalanın “Simurq” futbol komandası “Bakı” ilə oyunun hazırlıqlarını davam etdirir
Bakı, 31 oktyabr (AZƏRTAC). Zaqatalanın “Simurq” futbol komandası “Bakı” ilə oyunun hazırlıqlarını davam etdirir.
Klubdan AZƏRTAC-a bildirmişlər ki, “Neftçi” ilə oyundan sonra baş məşqçi Georgi Çixradze yetirmələrinə istirahət verməmişdir. Topaz Premyer Liqasının 12-ci turunda paytaxt təmsilçisinin qonağı olacaq “Simurq” görüşə hazırlığı “Şəfa” stadionunda davam etdirir.
Gündə bir dəfə olmaqla məşqə çıxan Zaqatala təmsilçisinin heyətində cəzalı futbolçuların geri qayıtması məşqçilər korpusunu sevindirən amillərdəndir. Draqan Çeran, Rəşad Eyyubov və İdan Vaitzman “Bakı” ilə görüşdə forma geyinə biləcəklər. İlkin Qırtımov isə son dəfə oyundan kənarda qalacaqdır. Uzun müddətdir ki, zədə səbəbindən əziyyət çəkən Rövşən Əmiraslanov isə artıq komanda ilə məşqlərə başlamışdır.
Qeyd edək ki, “Bakı” - “Simurq” oyunu noyabrın 1-də paytaxt klubunun təlim-məşq bazasının stadionunda keçiriləcəkdir.
Bölmənin digər xəbərləri
