Zaur Şükürov: Azərbaycan-Özbəkistan münasibətləri müttəfiqlik səviyyəsində uğurla inkişaf edir
Bakı, 22 avqust, AZƏRTAC
Azərbaycanla Özbəkistan arasında münasibətlərdə müşahidə edilən davamlı inkişaf meyilləri şübhəsiz, Azərbaycan-Mərkəzi Asiya əməkdaşlığına əhəmiyyətli töhfə verməkdədir. Ölkəmizin Cənubi Qafqazın və Orta Dəhlizin aparıcı dövləti, eyni zamanda, Özbəkistanın Mərkəzi Asiya regionunun vacib və dinamik inkişaf edən ölkələrindən biri olması, hər iki ölkənin liderləri arasında mövcud olan səmimi dostluq münasibətləri Azərbaycan-Özbəkistan ikitərəfli əlaqələrinin ardıcıl inkişafında mühüm rol oynayır.
Bu fikirləri AZƏRTAC-a açıqlamasında Milli Məclisin deputatı Zaur Şükürov deyib.
O bildirib ki, 2025-ci ildə iki ölkə arasında ticarət dövriyyəsinin 2024-cü illə müqayisədə üç dəfədən çox artaraq, 795 milyon dollar təşkil etməsi, 2026-cı ilin yanvar-may aylarında isə ötən ilin müvafiq dövrü ilə müqayisədə 33 faiz artaraq 144 milyon dollara çatması bu istiqamətdə sürətli inkişaf dinamikasını nümayiş etdirir. Bu xüsusda, ölkələrimiz arasında iqtisadi, ticari, investisiya və digər sahələrdə əlaqələrin inkişafında mühüm rol oynayan Hökumətlərarası Komissiyanın, habelə 2023-cü ildə 500 milyon ABŞ dolları məbləğində ümumi kapitalla təsis edilən, iqtisadi əməkdaşlığın və investisiya imkanlarının genişləndirilməsi, o cümlədən həm Azərbaycanda, həm də Özbəkistanda iqtisadiyyatın müxtəlif sektorlarında perspektivli layihələrin maliyyələşdirilməsinə və həyata keçirilməsinə əhəmiyyətli töhfə verən Azərbaycan-Özbəkistan İnvestisiya Şirkətinin fəaliyyəti təqdirəlayiqdir.
Zaur Şükürov diqqətə çatdırıb ki, iki ölkənin iqtisadi imkanları bir-birini tamamlayır və Azərbaycan şirkətlərinin Özbəkistanda və özbək şirkətlərinin Azərbaycanda daha fəal iştirakını, həmçinin birgə istehsal və investisiya layihələrinin sayının artması qarşılıqlı olaraq dəstəklənir. Ölkəmizdə sənaye, kənd təsərrüfatı, tikinti, nəqliyyat və xidmət sahələrində uğurla fəaliyyət göstərən Özbəkistan investisiyalı 130-dan çox kommersiya təşkilatı qeydiyyatdan keçib. Həmçinin Azərbaycan da Özbəkistanda investisiya layihələri həyata keçirir. Belə ki, bu layihələr arasında “PASHA Holding” tərəfindən “The Ritz-Carlton” brendi altında Daşkənddə inşa edilən hotel və yaşayış kompleksini, həmçinin Daşkənd vilayətində “Sea Breeze Uzbekistan” böyük turizm və yaşayış kompleksini qeyd etmək olar.
Qeyd olunanlarla yanaşı, beynəlxalq təşkilatlar çərçivəsində səmərəli əməkdaşlıq, xüsusilə TDT və keçən ilin noyabrında Daşkənddə Özbəkistanın sədrliyi ilə keçirilən Mərkəzi Asiya Dövlət Başçılarının 7-ci Məşvərət Görüşündə qəbul edilmiş qərara əsasən tamhüquqlu iştirak hüququ əldə etdiyimiz bu platforma müstəvisində əməkdaşlıq, habelə regionlararası əlaqələrin genişləndirilməsi uğurla davam edir.
O, həmçinin ölkələrimiz arasında mədəni-humanitar əlaqələrin də uğurla inkişaf etdiyini bildirib. Birgə keçirilən mədəniyyət günləri, incəsənət festivalları, elmi konfranslar, ədəbi nəşrlər və təhsil proqramları bu sahədə münasibətlərin möhkəmlənməsində xüsusi rol oynayır. 2023-cü və 2025-ci illərdə Azərbaycan Özbəkistan Mədəniyyəti Günlərinə, 2024-cü ildə Özbəkistan Azərbaycan Mədəniyyəti Günlərinə ev sahibliyi edib, həmin il Xivə şəhərində “Şuşa Günləri” keçirilib.
“Prezident İlham Əliyevin Özbəkistanın Milli İnformasiya Agentliyinə müsahibəsi iki ölkə arasında ortaq tarixə, mədəniyyətə, dil və mənəvi dəyərlərə, eləcə də xalqlarımızın əsrlərlə ötürdüyü qarşılıqlı rəğbətə əsaslanan ənənəvi qardaşlıqdan hüquqi cəhətdən rəsmiləşdirilmiş müttəfiqlik səviyyəsinə yüksələn siyasi, iqtisadi, humanitar və qarşılıqlı maraq doğuran digər sahələr üzrə münasibətləri aydın şəkildə əks etdirir. Əminliklə söyləmək olar ki, qarşıdakı səfər və təmaslar iki ölkə arasında qarşılıqlı maraqlar əsasında formalaşmış səmərəli əməkdaşlığın daha da dərinləşməsi, yeni birgə layihələrin gerçəkləşdirilməsi və müttəfiqlik münasibətlərimizin möhkəmləndirilməsində əhəmiyyətli rol oynayacaq”, - deyə Zaur Şükürov əlavə edib.
Bölmənin digər xəbərləri
