Zəfər Günü Azərbaycan tarixinin ən şanlı səhifələrindən biridir - ŞƏRH
Bakı, 8 noyabr, AZƏRTAC
“Vətən müharibəsinin başlamasına qədər bir çox ekspertlər, bəzi xarici ölkələrin nümayəndələri Azərbaycanın işğal altındakı torpaqlarını güc yolu ilə azad edə biləcəyinə inanmırdılar. Bəziləri açıq şəkildə deyirdilər ki, 30 ilə yaxındır torpaqlarımızı işğal altında saxlayan Ermənistan Qarabağda hərbi baxımdan möhkəmlənib, güclü istehkam, keçilməz sədlər qurub. Azərbaycan Ordusu o sədləri, minalanmış əraziləri keçib gedə bilməz. Həmçinin Ermənistanın arxasındakı güclər Azərbaycana imkan verməz ki, müharibəyə başlasın. Amma Azərbaycan Ordusu Ali Baş Komandan İlham Əliyevin “irəli” əmri ilə hərəkətə keçdi və 44 gün ərzində ən çətin tapşırıqların öhdəsindən layiqincə gələrək xalqımıza möhtəşəm Zəfər yaşatdı”.
Bu sözləri AZƏRTAC-a açıqlamasında politoloq Ramiz Alıyev söyləyib.
Onun sözlərinə görə, 8 Noyabr - Zəfər Günü Azərbaycan tarixinin ən şanlı səhifələrindən və ən əzəmətli günlərindən biridir: “Son 200 il ərzində daim parçalanan, ərazilər itirən Azərbaycan ilk dəfə olaraq ərazi bütövlüyünü, suverenliyini təmin etdi. Torpaqlarımızın azad edilməsi hər zaman dövlət siyasətinin əsasını təşkil edib. Bizim xarici siyasətimizdə, ölkələrlə münasibətlərimizdə ərazi bütövlüyü məsələsi münasibətlərimizin əsasını, mahiyyətini təşkil edib. Biz beynəlxalq səviyyədə aparılan müzakirələrdə də ərazi bütövlüyü məsələsini qırmızı xətt elan etmişdik. Bu gün də biz bu siyasətimizə sadiqik. Beynəlxalq təşkilatlar sənəd üzərində Azərbaycanın ərazi bütövlüyünü dəstəkləsələr də, Ermənistana qarşı heç vaxt sərt, qəti mövqe sərgiləməyiblər. İşğala məruz qalanla işğala məruz qoyan arasında bərabərlik işarəsi qoyublar. Həmin dairələr 30 il ərzində danışıq xatirinə formal görüşlər təşkil etdilər, bölgəyə turist səfərlərində oldular. Çox maraqlıdır ki, Qərbin demokrat saydığı qüvvələr Ermənistanda hakimiyyətə gəldikdən sonra Qarabağla bağlı açıqlamalarda daha barışmaz davrandı. Əlləri günahsız insanların qanına batmış, işğalda birbaşa iştirak etmiş Ermənistanın əvvəlki prezidentlərindən fərqli olaraq “demokrat” Nikol Paşinyan daha da irəli gedərək “Qarabağ Ermənistandır” dedi. Xalqımız, qəhrəman övladlarımız çox qısa zaman kəsiyində bir yumruq kimi birləşərək Ali Baş Komandanın rəhbərliyi ilə torpaqlarımızı azad etdi. 44 günlük Vətən müharibəsində bizim bir nəfər belə fərarimiz, döyüşdən yayınanımız olmadı. Ziyalılarımız, sənət adamlarımız, sıravi insanlarımız bir oldular. Bizim sərgilədiyimiz müharibə, hərbi təcrübəmiz və əldə etdiyimiz Qələbə bu gün xarici ölkələrdə öyrənilir. Xarici siyasətçilər etiraf edirlər ki, XXI əsrdə hər ölkə müharibə yolu ilə ərazi bütövlüyünü təmin edə bilmir. Azərbaycan isə bunu bacardı”.
R.Alıyev qeyd edib ki, noyabrın 8-də Şuşanın azad edilməsi 44 günlük Vətən müharibəsinin təntənəsi oldu: “Şuşanın azad edilməsi ilə Qarabağdakı terrorçuların Ermənistanla əlaqəsi kəsildi və mühasirəyə düşdülər. Bunu anlayan Nikol Paşinyan kapitulyasiyaya gedərək noyabrın 9-dan 10-na keçən gecə üçtərəfli Bəyanatı imzaladı. Həmin Bəyanata uyğun olaraq, Ermənistan noyabrın 20-də Ağdam, 25-də Kəlbəcər, dekabrın 1-də isə Laçın rayonlarını Azərbaycan Silahlı Qüvvələrinə təhvil verdi. Əldə etdiyimiz Qələbə Azərbaycan dövlətinin beynəlxalq aləmdə nüfuzunu yüksəltdi. Bəziləri düşünürdü ki, Azərbaycan üçtərəfli Bəyanatla təsbit edilmiş status-kvonu dəyişməyə risk etməyəcək. Rus sülhməramlıların ərazidə olmasını əsas götürən müxalifət nümayəndələri qələbəmizi “yarımçıq” hesab edir, uğurlarımıza kölgə salırdılar. Sonrakı 3 il ərzində Azərbaycan dövlətinin rəhbəri, Ali Baş Komandan İlham Əliyev çox cəsarətli addımlar atdı. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü. Növbəti addım Laçında sərhəd-keçid məntəqəsinin qurulması oldu. Ordumuz bu il sentyabrın 19-da 24 saat ərzində antiterror tədbirləri həyata keçirərək separatçıların tör-töküntülərini məhv etdi. Bununla da Azərbaycan Ordusu Xocalı, Ağdərə, Əsgəran və Xankəndiyə nəzarəti təmin etdi və suverenliyimiz təmin olundu. İndi Azərbaycanın hər bir guşəsində üçrəngli Bayrağımız dalğalanır”.
Politoloq vurğulayıb ki, Azərbaycan dövləti dünyanı fakt qarşısında qoydu. “Bu gün Qarabağ və Şərqi Zəngəzur böyük tikinti meydançasını xatırladır. Azad olunan ərazilərdə kəndlər, şəhərlər salınır. Xankəndi, Xocalı və Əsgəranda bir dənə də ev, məktəb, xəstəxana zərər görməyib, mülki ermənilər heç bir xəsarət almayıblar. Azərbaycan dövləti onlara Qarabağda qalıb yaşamaq təklifini etdi, amma onlar müxtəlif səbəblərdən burada qalmadı. Azərbaycan xalqı 8 Noyabr - Zəfər Gününü qürurla qeyd edir”, - deyə o əlavə edib.
Bölmənin digər xəbərləri
