Zəngəzur dəhlizi Azərbaycan və region ölkələri üçün iqtisadi dividendlər qazandıracaq – ŞƏRH
Bakı, 15 may, AZƏRTAC
Zəngəzur dəhlizi təkcə Azərbaycan üçün deyil, bütövlükdə region ölkələri, hətta Çindən Avropaya qədər uzanan geniş coğrafiya üçün olduqca mühüm layihə hesab olunur. Bu dəhliz siyasi, tarixi, iqtisadi, geoiqtisadi, enerji və digər aspektlər baxımından qiymətləndirildikdə region üçün strateji əhəmiyyət daşıyan platforma kimi çıxış edəcək. Eyni zamanda, real fiziki nəqliyyat dəhlizi funksiyasını yerinə yetirəcək.
Bu sözləri AZƏRTAC-a açıqlamasında iqtisadçı-ekspert Eldəniz Əmirov bildirib.
O bildirib ki, məsələyə Azərbaycan kontekstindən yanaşdıqda, ilk növbədə qeyd edilməli əsas amil Naxçıvanla birbaşa quru əlaqəsinin yaranmasıdır.
“Bu dəhliz Azərbaycanın əsas hissəsi ilə Naxçıvan arasında birbaşa quru bağlantısını təmin edəcək ki, bu da logistika fəaliyyətinin genişlənməsinə, sərnişin daşımalarının asanlaşmasına və nəqliyyat xərclərinin azalmasına mühüm töhfə verəcək. Digər vacib məqamlardan biri Azərbaycanın əsas hissəsi ilə Türkiyə arasında birbaşa əlaqənin formalaşmasıdır. Zəngəzur dəhlizi vasitəsilə Azərbaycan Türkiyə ilə ən qısa ticarət marşrutuna sahib olacaq. Bu isə ölkələr arasında vətəndaşların, sahibkarların və müxtəlif təsərrüfat subyektlərinin gediş-gəlişini asanlaşdıracaq, eyni zamanda idxal və ixrac proseslərinin sürətlənməsinə şərait yaradacaq.
Bundan əlavə, dəhlizin açılması Azərbaycanın tranzit gəlirlərinin artmasına da müsbət təsir göstərəcək. Çünki gələcəkdə Zəngəzur dəhlizi həm Orta Dəhlizin, həm də müəyyən mənada Şimal-Cənub nəqliyyat marşrutunun mühüm seqmentlərindən birinə çevrilə bilər. Artıq məlumdur ki, bu layihə yalnız avtomobil və dəmir yolu xəttindən ibarət olmayacaq. Buradan enerji resurslarının ötürülməsi, həmçinin rəqəmsal infrastruktur xətlərinin keçirilməsi də mümkündür. Bu baxımdan, Zəngəzur dəhlizi Orta Dəhlizin mühüm hissəsi kimi həm Azərbaycan, həm də region ölkələri üçün ciddi iqtisadi dividendlər qazandıracaq”,- deyə o qeyd edib.
E.Əmirov əlavə edib ki, dəhlizin ən mühüm üstünlüklərindən biri də Qarabağ və Şərqi Zəngəzurun iqtisadi canlanmasına verəcəyi töhfədir: “Bu bölgələrdə iqtisadi aktivliyin artması, yeni investisiyaların cəlb olunması və infrastrukturun inkişafı baxımından dəhlizin müstəsna rolu olacaq.
Ümumilikdə, Zəngəzur dəhlizinin açılması Azərbaycanın qlobal geoiqtisadi mövqeyinin daha da güclənməsinə xidmət edəcək. Bununla yanaşı, ölkənin idxal və ixrac imkanlarının şaxələndirilməsi, beynəlxalq ticarət əlaqələrinin genişlənməsi və regiondakı strateji əhəmiyyətinin artması üçün yeni imkanlar yaradacaq”.
Bölmənin digər xəbərləri
