Zəngilan və Şərqi Zəngəzur yaxın gələcəkdə Azərbaycanın iqtisadi xəritəsində xüsusi yer tutacaq - ŞƏRH
Bakı, 14 may, AZƏRTAC
Prezident İlham Əliyevin Zəngilan və ümumilikdə Şərqi Zəngəzur bölgəsinə səfəri həmin ərazilərin inkişafı istiqamətində genişmiqyaslı işlərin davam etdiyini bir daha nümayiş etdirir.
Bu fikirləri AZƏRTAC-a açıqlamasında iqtisad elmləri üzrə fəlsəfə doktoru, iqtisadçı-ekspert Günay Hüseynova bildirib.
Ekspert qeyd edib ki, yaxın gələcəkdə Şərqi Zəngəzur Azərbaycanın iqtisadi xəritəsində xüsusi inkişaf tempi və yüksələn iqtisadi göstəriciləri ilə seçilən bölgələrdən birinə çevriləcək.
Onun sözlərinə görə, həyata keçirilən layihələrin ən mühüm nəticələrindən biri yeni iş yerlərinin yaradılmasıdır: “Bu proses işsizlik səviyyəsinin azalmasına mühüm töhfə verir. İnfrastruktur layihələrinin və müxtəlif iqtisadi təşəbbüslərin icrası həm ali təhsilli, həm də peşə ixtisası olmayan işsiz şəxslərin məşğulluq imkanlarını artırıb”.
G.Hüseynova vurğulayıb ki, Prezident İlham Əliyevin çıxışlarında “ağıllı şəhər” və “ağıllı kənd” layihələrinə xüsusi diqqət ayrılması bölgədə müasir idarəetmə və məskunlaşma modelinin tətbiq olunacağını göstərir. “Bu yanaşma xarici investorların marağını daha da artırır. Artıq müxtəlif ölkələrin investorları və iş adamları bölgədə yol tikintisi, hotelçilik, restoran biznesi və digər sahələrdə layihələr həyata keçirirlər”, - deyə ekspert əlavə edib.
G.Hüseynova bildirib ki, qeyri-rezident investorlar üçün iş və yaşayış icazələrinin sadələşdirilməsi də bölgəyə investisiya axınını stimullaşdıran amillərdəndir.
İqtisadçı-ekspertin fikrincə, Prezident İlham Əliyevin Şərqi Zəngəzur və Zəngilan bölgəsinə səfəri strateji əhəmiyyət daşıyır və postmünaqişə dövründə dövlətin iqtisadi və sosial gücünü nümayiş etdirir.
“Qarabağa əhalinin mərhələli şəkildə köçürülməsi, onlar üçün müasir və komfortlu yaşayış şəraitinin yaradılması dövlətin uzunmüddətli inkişaf strategiyasının tərkib hissəsidir. İnsanlar əvvəlki dövrlərin dağıdılmış və köhnəlmiş infrastrukturuna deyil, milyardlarla manat investisiya qoyulan, iqtisadi potensialı sürətlə inkişaf edən bölgələrə qayıdırlar”, - deyə G.Hüseynova vurğulayıb.
Müxbir - Pərvanə Qafarova
Bölmənin digər xəbərləri
