Dəniz səviyyəsindən 1232 metr yüksəklikdə yerləşən Çıraqqalaya yeni ekoturizm marşrutu yaradılıb VİDEO
Şabran, 10 noyabr, Elxan Yusifli, AZƏRTAC
Noyabrın 10-da “Çıraqqala” Tarix-Memarlıq Qoruğuna yeni yaradılan ekoturizm marşrutu üzrə ilk yürüş təşkil olunub. Şabran rayonu ərazisindəki tarixi abidə dəniz səviyyəsindən 1232 metr yüksəklikdə yerləşir.
AZƏRTAC xəbər verir ki, bu yürüşlə Prezident yanında Gənclər Fondunun Mədəniyyət və Turizm Nazirliyi ilə birgə ölkəmizdə aktiv turizmin təbliğ olunması məqsədilə həyata keçirdiyi yeni layihənin icrasına başlanılıb.
Gənclər Fondu Aparatının rəhbəri Faiq Qürbətov bildirib ki, layihə aktiv turizmin təşviqinə, gənclərin asudə vaxtının səmərəli təşkilinə xidmət etməklə yanaşı, tarixi abidələrimizin təbliği məqsədi daşıyır: “Son illər ölkəmizdə turizm sənayesinin müxtəlif növləri inkişaf etməkdədir. Gənclər arasında da aktiv turizmə böyük maraq var. Buna görə də layihə Mədəniyyət və Turizm Nazirliyi, eləcə də bu turizm növü ilə məşğul olan turizm şirkətləri ilə birgə həyata keçirilir. Layihə çərçivəsində ölkəmizdəki qoruqlarda turizmin müxtəlif növlərinin (piyada, dağçılıq, atçılıq və s.) inkişafı, yeni turizm marşrutlarının təşkili, turlara dair məlumat kitabçalarının hazırlanması, habelə marşrutlar üzrə abadlıq işlərinin aparılması, istiqamət göstəriciləri və məlumat lövhələrinin quraşdırılması planlaşdırılır”.
Faiq Qürbətov diqqətə çatdırıb ki, ilk səfərin gerçəkləşdirildiyi “Çıraqqala”ya qalxan yolun üzərində məlumat lövhələri və yol göstərici nişanlar qoyulub. Bu da tarixi abidəni görmək istəyən yerli və xarici turistlərin rahat, təhlükəsiz şəkildə yürüş etmələrinə yardımçı olacaq. Layihə üzrə belə yürüşlərin davamlı olaraq təşkili nəzərdə tutulub.
Yürüş zamanı “Çıraqqala” Tarix-Memarlıq Qoruğunun direktoru Cavid Xudaverdiyev tərəfindən iştirakçılara Çıraqqala tarixi abidəsi haqqında ətraflı məlumat verilib.
Bildirilib ki, Çıraqqala Gilgilçay müdafiə divarının ən yüksək nöqtəsi olaraq IV-VI əsrlərdə Böyük İpək Yolunun qorunması məqsədilə tikilib. Hündürlüyü 100-120 metr olan sıldırım qayanın üzərində ucalan baş qüllədən bir tərəfdən Dərbənd, digər tərəfdən Beşbarmaq səddinəcən dəniz sahili boyu ərazini nəzarətdə saxlamaq mümkün olub. 17 bürcdən ibarət qala əsasən yerli daşlardan və bişmiş kərpicdən inşa edilib. Divarların hündürlüyü 8-10 metr, qalınlığı isə 3-4 metrdir.
Azərbaycanın tarixi irsinin və xalqımızın memarlıq ənənələrinin mühüm nümunələrindən olan Çıraqqala tarixi abidələr kompleksinin gələcək nəsillər üçün saxlanılmasının, bərpasının və mühafizəsinin təmin edilməsi məqsədilə 2003-cü il iyunun 23-də Prezident Heydər Əliyev tərəfindən sərəncam imzalanıb. Prezidentin 2006-cı il 27 sentyabr tarixli sərəncamı ilə abidələr kompleksinin ərazisi “Çıraqqala” Tarix-Memarlıq Qoruğu elan edilib.
Qeyd edək ki, “Montain Host Azerbaijan”, “Nature Discovery Azerbaijan”, “Ekotur”, “Vertikal”, “Gilavar Public Union” kimi aktiv turizm klubları yürüşə təşkilatı dəstək göstəriblər.
Yeni yaradılan ekoturizm marşrutunun ümumi uzunluğu 2 min 890 metr, başlanğıc hündürlüyü 640 metr, maksimal hündürlüyü 1322 metrdir. Marşrut 11 ədəd yolgöstərici dirəklər və rənglərlə nişanlanıb. Bununla yanaşı, başlanğıcda marşrut, sonda isə Çıraqqala barədə məlumat lövhələri yerləşdirilib.
Bölmənin digər xəbərləri
