Azərbaycan Mərkəzi Asiya ilə Avropa arasında mühüm bağlantı nöqtəsinə çevrilir - ŞƏRH
Bakı, 9 oktyabr, AZƏRTAC
Prezident İlham Əliyevin Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşündə iştirakı və Azərbaycanın regional əməkdaşlıq formatına tamhüquqlu üzv kimi qoşulması ölkənin Mərkəzi Asiya siyasətində yeni mərhələnin formalaşdığını göstərən mühüm siyasi hadisədir. Bu proses Azərbaycanın regionla münasibətlərinin ənənəvi ikitərəfli əlaqələr çərçivəsindən çıxaraq daha geniş, institusional və strateji əməkdaşlıq modelinə çevrildiyini nümayiş etdirir.
Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, Azərbaycanın Məşvərət formatına tamhüquqlu üzv kimi qoşulması, ilk növbədə, ölkənin regional siyasi və iqtisadi proseslərdə artan rolunun göstəricisidir. Bu addım Azərbaycanın yalnız Xəzər dənizinin qərb sahilində yerləşən tranzit ölkə kimi deyil, Mərkəzi Asiya ilə Avropa arasında siyasi, iqtisadi və kommunikasiya əlaqələrinin qurulmasında fəal iştirak edən strateji tərəfdaş kimi mövqeyini gücləndirir. Eyni zamanda, bu üzvlük Xəzər hövzəsi ətrafında ortaq maraqlara əsaslanan regional əməkdaşlığın daha sistemli xarakter almasına zəmin yaradır.
“Azərbaycan-Türkmənistan münasibətlərinin inkişafı da bu kontekstdə xüsusi əhəmiyyət daşıyır. İki ölkə arasında yüksək səviyyəli siyasi təmasların intensivləşməsi qarşılıqlı etimadın möhkəmləndiyini və əməkdaşlığın strateji məzmununun genişləndiyini göstərir. Füzuli şəhərində Türkmənistan tərəfindən məscidin inşa edilməsi isə münasibətlərin yalnız siyasi və iqtisadi maraqlarla məhdudlaşmadığını, ortaq tarixi, mənəvi və mədəni dəyərlərə söykəndiyini nümayiş etdirir. Bu cür təşəbbüslər Azərbaycan və Türkmənistan xalqları arasında qardaşlıq münasibətlərinin möhkəmləndirilməsi baxımından mühüm simvolik məna daşıyır.
Mərkəzi Asiya dövlətlərinin Azərbaycanın işğaldan azad edilmiş ərazilərinin bərpasında iştirakı da regional həmrəyliyin diqqətəlayiq nümunəsidir. Füzulidə Mirzə Uluqbəy adına məktəbin, Ağdamda Manas adına məktəbin və Kurmanqazı adına Uşaq Yaradıcılıq Mərkəzinin yaradılması region ölkələrinin Azərbaycanın bərpa və quruculuq prosesinə verdiyi dəstəyin konkret ifadəsidir”, - deyə Ə.Məhərrəmzadə vurğulayıb.
Deputat qeyd edib ki, nəqliyyat və logistika sahəsi Azərbaycan-Mərkəzi Asiya əməkdaşlığının ən mühüm istiqamətlərindən biri olaraq qalır. Azərbaycanın coğrafi mövqeyi ölkəni Mərkəzi Asiya ilə Avropa arasında yükdaşımaların həyata keçirilməsində mühüm bağlantı nöqtəsinə çevirir. Xəzər dənizinin hər iki sahilində limanların, dəmir yollarının və avtomobil nəqliyyatı infrastrukturunun inkişaf etdirilməsi Orta Dəhlizin imkanlarını genişləndirir.
Rəqəmsal bağlantıların inkişafı da regional inteqrasiyanın yeni istiqamətlərindən biri kimi diqqət çəkir. Xəzər dənizinin dibi ilə fiber-optik infrastrukturun yaradılması və “Rəqəmsal İpək Yolu” təşəbbüsünün inkişaf etdirilməsi Azərbaycanla Mərkəzi Asiya arasında informasiya mübadiləsinin sürətlənməsi, rəqəmsal iqtisadiyyatın genişlənməsi və Avropa ilə əlaqələrin möhkəmləndirilməsi baxımından strateji əhəmiyyət daşıyır. Energetika sahəsində əməkdaşlıq isə Azərbaycanın regional tərəfdaşlıq modelinin digər mühüm dayağını təşkil edir. Qazaxıstan və Özbəkistanla yaşıl enerji dəhlizinin yaradılması istiqamətində əməkdaşlıq ənənəvi enerji resursları ilə bağlı münasibətlərin bərpaolunan enerji sahəsini də əhatə etməyə başladığını göstərir.
Bütün bu amillər Azərbaycanla Mərkəzi Asiya dövlətləri arasında münasibətlərin geosiyasi məzmununun da gücləndiyini göstərir. Qlobal iqtisadi və logistika marşrutlarının şaxələndirilməsinin aktuallaşdığı bir şəraitdə Xəzər hövzəsi Avropa ilə Asiya arasında mühüm strateji bağlantı məkanına çevrilir. Azərbaycanın bu prosesdəki rolu onun həm Mərkəzi Asiya ölkələrinin Avropa bazarlarına çıxışında, həm də Avropa ilə Mərkəzi Asiya arasında iqtisadi əlaqələrin inkişafında əhəmiyyətini artırır. Eyni zamanda, bu əməkdaşlıq regional dövlətlərə mövcud imkanlardan daha səmərəli istifadə etmək və qarşılıqlı iqtisadi asılılığı faydalı tərəfdaşlıq mexanizminə çevirmək imkanı yaradır”,-deyə o əlavə edib.
Bölmənin digər xəbərləri
