Şamaxıda II Milli Mühasiblər Forumu öz işinə başlayıb VİDEO
Şamaxı, 28 aprel, AZƏRTAC
Vergilər Nazirliyi, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, Auditorlar Palatası, “İqtisadi Resursların Öyrənilməsi” İctimai Birliyi, Azərbaycan Mühasiblər və Risk Peşəkarları Assosiasiyası (ARPA), Azərbaycan Professional Maliyyə Menecerləri Assosiasiyası (APFM), İqtisadi Araşdırmalar və Tədris Mərkəzi, Gənc Mühasiblər Birliyi, Azərbaycan Bank Tədris Mərkəzi (ABTC) və Azərbaycan Universitetinin birgə təşkilatçılığı ilə aprelin 28-də Şamaxıda II Milli Mühasiblər Forumu işə başlayıb.
AZƏRTAC-ın bölgə müxbiri xəbər verir ki, Vergilər Nazirliyinin Şamaxıdakı Tədris Mərkəzində təşkil olunan forumda 350 nəfərdən çox mütəxəssis toplanıb və forum iki gün davam edəcək.
Forumun məqsədlərinə mühasibat uçotu, eləcə də vergi qanunvericiliyi də daxil olmaqla, aidiyyəti qanunvericilikdə baş verən yeniliklər və onların mahiyyəti barədə iştirakçıların məlumatlandırılması, qarşılıqlı fikir mübadiləsi əsasında mövcud problemlər və onların həlli yollarının müzakirəsi, müasir beynəlxalq təcrübələrin tətbiqi imkanlarının birgə araşdırılması kimi məsələlər daxildir.
II Milli Mühasiblər Forumunun açılışında çıxış edən Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev Azərbaycanda aparılan iqtisadi siyasətin əsas istiqamətləri barədə danışıb. Bildirilib ki, Azərbaycan iqtisadiyyatının qısa, orta və uzunmüddətli inkişaf hədəflərinin müəyyənləşdirildiyi “Milli iqtisadiyyat və iqtisadiyyatın əsas sektorları üzrə strateji yol xəritəsi”ndə nəzərə tutulan kompleks tədbirlər sırasında hesabatlığın təkmilləşdirilməsi və şəffaflığın artırılması xüsusi vurğulanıb. Bu baxımdan ölkəmizdə maliyyə nəzarətinin, maliyyə və vergi intizamının möhkəmləndirilməsi, maliyyə vəsaitlərindən istifadə olunmasında hesabatlığın və şəffaflığın beynəlxalq standartlar əsasında yüksək səviyyədə qurulması ilə bağlı məsələlərin müzakirəsi təqdirəlayiqdir.
Vergilər nazirinin birinci müavini Sahir Məmmədxanov çıxışında bildirib ki, milli mühasibatlığın və vergi sisteminin qarşısında duran mövcud çağırışların, respublika maliyyə, uçot, audit işinin dünya standartlarına uyğunlaşdırılması istiqamətində atılacaq səmərəli addımların belə bir forumda müzakirəsi olduqca faydalıdır. S.Məmmədxanov vergi sistemində aparılacaq islahatlarla bağlı forum iştirakçılarına məlumat verib. Bildirilib ki, vergi ödəyiciləri ilə münasibətdə şəffaflığın təmin olunması, vergilərini tam həcmdə və vaxtında ödəyən vergi ödəyicilərinin dəstəklənməsi, vergidən yayınma ilə mübarizənin genişləndirilməsi, vergi sistemində yeni informasiya texnologiyalarının tətbiqinin davamlı olması qarşıda duran əsas məsələlərdir.
Forumun plenar iclasında Şamaxı Rayon İcra Hakimiyyəti başçısının birinci müavini Qasım Qasımov, “Gilan Holdinq”in İdarə Heyətinin üzvü Fuad Kərimov, Azərbaycan Banklar Assosiasiyasının sədri Zakir Nuriyev, Türkiyənin İşık Universitetinin rektoru Cemal İbiş, N.Tusi adına Şamaxı Astrofizika Rəsədxanasının direktoru Namiq Cəlilov, Rusiya Federasiyasının Dövlət Maliyyə Universitetinin dekanı Vladimir Avdiyski çıxış ediblər. Natiqlər II Milli Mühasiblər Forumunun iqtisadi sektorda yeni çağırışlar üçün əlverişli platforma olacağına əminliklərini vurğulayıblar.
Forum işini müxtəlif bölmələrdə davam etdirib və mühasibatlıq sahəsində mövcud vəziyyət və problemlər, vergi qanunvericiliyi və mühasibat uçotu, maliyyə hesabatının beynəlxalq standartlarının tətbiqində təhsil və sertifikasiyanın rolu, kommersiya qurumlarında mühasibat uçotunun problemləri, mühasibat uçotu proqramları təminatında müasir çağırışlar və sair mövzularda təqdimatlar və çıxışlar dinlənilib.
II Milli Mühasiblər Forumu aprelin 29-da öz işini davam etdirəcək.
Bölmənin digər xəbərləri
