Respublika Günü və Azərbaycan diplomatik xidmət orqanlarının 100 illiyi münasibətilə Kişineuda rəsmi qəbul keçirilib VİDEO
Kişineu, 29 may, AZƏRTAC
Azərbaycanın Moldovadakı səfirliyi tərəfindən Respublika Günü və Azərbaycan diplomatiyasının 100 illiyinə həsr olunan rəsmi qəbul təşkil edilib.
Səfirlikdən AZƏRTAC-a bildiriblər ki, tədbirdə Moldovanın Baş Naziri Pavel Filip, digər yüksəksəviyyəli dövlət və hökumət rəsmiləri, parlamentin birinci vitse-spikeri Vladimir Vityuk, deputatlar, diplomatlar, tanınmış ictimai-siyasi xadimlər, KİV nümayəndələri, Moldova Azərbaycanlıları Konqresinin üzvləri, bu ölkədə təhsil alan tələbələr, iş adamları və digər qonaqlar iştirak ediblər.
Tədbirin açılışında qonaqlar foyedə Azərbaycan Xalq Cümhuriyyətinin 101 illiyi və Azərbaycan diplomatiyasının 100 illiyinə həsr olunmuş banner, Azərbaycan Respublikasının ilk qurulduğu vaxtdan müasir dövrə qədər keçdiyi inkişaf yolunu əks etdirən fotosərgi və “İRS” jurnalının Azərbaycan diplomatiyasının 100 illiyinə həsr edilmiş xüsusi buraxılışı ilə tanış olublar. Bundan əlavə, tədbirdə “Mən Azərbaycan haqqında nə bilirəm” müsabiqəsinin qaliblərinə mükafatlar təqdim olunub.
Əvvəlcə Azərbaycanın və Moldovanın dövlət himnləri səsləndirilib, Azərbaycan Respublikasının 101 illik və Azərbaycan diplomatiyasının 100 illik tarixini özündə əks etdirən fotoslayd göstərilib. Qonaqlara Azərbaycanın qədim tarixi-mədəni abidələrini, əsrarəngiz təbiətini, adət-ənənələrini, həmçinin ölkəmizin müxtəlif sahələrdə əldə etdiyi uğurları əks etdirən sənədli film nümayiş olunub.
Tədbirdə çıxış edən Azərbaycanın Moldovadakı səfiri Qüdsi Osmanov bildirib ki, 1918-ci il mayın 28-də ilk dəfə olaraq Şərqdə dünyəvi dəyərlərə söykənən demokratik və müstəqil Azərbaycan Respublikası yaradılıb. Həmçinin 100 il əvvəl Azərbaycanın diplomatik xidmət orqanı olan Xarici İşlər Nazirliliyi yaradılıb və bununla da Azərbaycan diplomatiyasının əsası qoyulub. Səfir qeyd edib ki, yeni qurulmuş Azərbaycan Xalq Cümhuriyyəti cəmi 23 ay yaşamasına baxmayaraq, Azərbaycanın ictimai-siyasi, təhsil, mədəni və s. sahələrində bir sıra nailiyyətlər əldə edib və ilklərə imza atıb.
Diplomat müasir müstəqil Azərbaycan Respublikasının banisi ümummilli lider Heydər Əliyevin 1993-cü ildə xalqın çağırışı ilə yenidən hakimiyyətə qayıdaraq Azərbaycanın hərtərəfli inkişafında yeni səhifə açdığını söyləyib. O, həmçinin Azərbaycanın dünya arenasındakı nüfuzundan, bir çox sahələrdə qazandığı uğurlardan, neft-qaz kəmərlərindən, eləcə də Bakıda keçirilmiş beynəlxalq əhəmiyyətli tədbirlərdən danışıb. Səfir qonaqlara 2018-ci ildə Azərbaycanda siyasi, iqtisadi, mədəni və digər sahələrdə baş vermiş mühüm hadisələr barədə məlumat verib.
Azərbaycan ilə Moldova arasında dostluq münasibətlərinə toxunan diplomat əlaqələrin qarşılıqlı maraq və əməkdaşlıq əsasında qurulduğunu bildirib və iki ölkənin oxşar problemlərindən bəhs edib. O, Moldovanın Azərbaycanın ağrılı problemi olan Dağlıq Qarabağ münaqişəsinin beynəlxalq hüququn prinsip və normalarına uyğun olaraq həll edilməsinin tərəfdarı olduğunu və beynəlxalq arenada daim Azərbaycanın düzgün mövqeyini dəstəklədiyini bildirib. Səfir bunun Azərbaycan üçün çox önəmli olduğunu, oxşar problemlə üzləşən Moldovanın daim Azərbaycan tərəfindən dəstəklənəcəyini qeyd edib.
Daha sonra Moldova Respublikasının Baş Naziri Pavel Filip çıxış edib. Dövlətlərimiz arasında mövcud olan sıx və mehriban münasibətlərə toxunan Baş Nazir bu əlaqələrin istər regional, istərsə də beynəlxalq təşkilatlar səviyyəsində arzuolunan müstəvidə inkişafından məmnunluğunu ifadə edib.
Moldova Respublikasının bariton müğənnisi Vitalie Maçiunişin Müslüm Maqomayevin repertuarından ifa etdiyi musiqilər, Azərbaycan mahnılarının sədaları altında Moldovanın milli rəqs qrupunun ifaları, həmçinin Azərbaycan milli mətbəxinin təamları tədbir iştirakçılarının zövqünü oxşayıb.
Tədbir Moldovanın yerli KİV-də geniş işıqlandırılıb.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
