Ankarada azərbaycanlı media nümayəndələri üçün təşkil olunan “Müharibə dövründə jurnalistika” mövzusunda təlimlər başa çatıb VİDEO
Ankara, 20 avqust, Nicat Məmmədov, AZƏRTAC
Anadolu Agentliyinin, Türk Əməkdaşlıq və Koordinasiya Agentliyinin (TİKA), Türkiyə Polis Akademiyasının və Azərbaycan Respublikasının Medianın İnkişafı Agentliyinin (MEDİA) birgə təşkilatçılığı ilə Ankarada keçirilən “Müharibə dövründə jurnalistika” mövzusunda təlimlərə yekun vurulub.
AZƏRTAC xəbər verir ki, avqustun 20-də Türkiyənin Polis Akademiyasında təlimlərin bağlanış mərasimi keçirilib. Mərasimdə Anadolu agentliyinin baş direktoru və idarə heyətinin sədri Sərdar Karagöz, Türkiyə Baş Polis İdarəsinin rəisi Mehmet Aktaş, Polis Akademiyasının rəisi Yılmaz Çolak, rəis müavini Fatih İnal, TİKA-nın xarici əlaqələr və tərəfdaşlar departamentinin rəhbəri Uğur Tanyeli, Azərbaycanın Türkiyədəki səfirliyinin əməkdaşları iştirak ediblər.
Mərasimdə əvvəlcə Türkiyə Cümhuriyyətinin qurucusu Mustafa Kamal Atatürkün, eyni zamanda, Qarabağ müharibəsində canlarından keçən şəhidlərin ruhu bir dəqiqəlik sükutla yad edilib. Sonra Türkiyənin Dövlət Himni səsləndirilib.
Mərasimdə çıxış edən Anadolu agentliyinin baş direktoru Sərdar Karagöz azərbaycanlı jurnalistləri təlimləri uğurla başa vurmaları münasibətilə təbrik edib. Təlimlərin müharibə dövründə və digər çətin şəraitdə media nümayəndələrinin sağlamlığı və fəaliyyəti üçün önəmini vurğulayan Sərdar Karagöz deyib: “Jurnalist cəbhə bölgəsində döyüşən əsgərlərlə eyni dərəcədə fədakarlıq göstərir. Qardaş ölkələrimiz müharibə dövründə çoxlu sayda şəhid verib. Kəlbəcərdə iki jurnalistin şəhid olması xəbəri bizi dərindən sarsıtdı. Bu göstərdi ki, düşmən hər cür cinayətkar əməllərə əl atır. “Müharibə dövründə jurnalistika” mövzusunda təlimlər məhz bu baxımdan çox faydalıdır”.
Azərbaycan ilə Türkiyə arasında qardaşlıq münasibətlərinin bütün sahələrdə genişləndiyini vurğulayan Sərdar Karagöz ölkələrimizin dövlət informasiya agentlikləri - AZƏRTAC ilə Anadolu agentliyinın də sıx əməkdaşlıq etdiklərini bildirib.
Anadolu agentliyinin Xəbər Akademiyasının direktoru Bora Bayraktar “Müharibə dövründə jurnalistika” mövzusunda təlimlərə artıq dünyanın müxtəlif ölkələri tərəfindən böyük maraq göstərildiyini bildirib: “Hər ilk keçirilən təlimlərdə dünyanın bir çox ölkələrindən jurnalistlər iştirak edirlər. Lakin budəfəki təlimlər əvvəlkilərdən xeyli fərqlənir. Çünki bu təlimlərdə qardaş Azərbaycandan olan jurnalistlər - 44 günlük Vətən müharibəsinin işıqlandırılmasında fədakarlıq göstərən media nümayəndələri iştirak edirdilər. Sizin kimi fədakar jurnalistlərlə təcrübə mübadiləsi aparmaq bizim üçün də çox önəmlidir”.
Türkiyə Baş Polis İdarəsinin rəisi Mehmet Aktaş, Polis Akademiyasının rəisi Yılmaz Çolak, rəis müavini Fatih İnal, TİKA-nın xarici əlaqələr və tərəfdaşlar departamentinin rəhbəri Uğur Tanyeli də çıxışlarında təlimi uğurla başa vurmaları münasibətilə azərbaycanlı jurnalistləri təbrik ediblər.
Mərasimdə təlimi uğurla başa vuran jurnalistlər beynəlxalq səviyyədə tanınan “Hərbi jurnalistika sertifikatı” ilə təltif ediliblər. AZƏRTAC-ın müxbiri Nicat Məmmədov da təlimi uğurla başa vurduğu üçün “Hərbi jurnalistika sertifikatı” ilə təltif olunub.
Qeyd edək ki, avqustun 9-dan 20-dək keçirilmiş təlimdə Azərbaycandan 24 jurnalist qatılıb.
Təlimlərin məqsədi jurnalistlərin müharibə, təbii fəlakətlər, böhran və fövqəladə vəziyyətlər zamanı peşəkarlığının artırılmasıdır. Təlimlərdə müharibə, təbii fəlakətlər, fövqəladə vəziyyət və böhran vəziyyətlərində jurnalistlərin təhlükəsizliyi, davranış qaydaları və fəaliyyəti, müharibə nəzəriyyəsi və terminologiyası, kimyəvi və bioloji silahların tətbiqi zamanı qorunma, ilk yardımın göstərilməsi, suda həyatda qalma, hava və dəniz əməliyyatları, xəritənin oxunması, sosial hadisələr, qaçqın düşərgələri, fövqəladə hallarda texnologiya və informasiya təhlükəsizliyi, inandırma strategiyaları, avtomobilin idarə olunması, girov götürülmə simulyasiyaları, pusqudan müdafiə üsulları, fövqəladə hallarda media idarəçiliyi, yayım prinsipləri və digər mövzularda 26 dərs keçirilib. Dərslərin 60 faizi praktiki hissədən ibarət olub. Bununla yanaşı, media nümayəndələri riskli bölgələrdə təşkil olunacaq təlimlərə də qatılıblar.
Anadolu Agentliyinin Xəbər Akademiyası tərəfindən 2012-ci ildən indiyədək təşkil edilən təlimlərə 118-i əcnəbi olmaqla, 327 media nümayəndəsi qatılıb.
Bölmənin digər xəbərləri
