Şirvanda şəhid Röyal Məmmədovun xatirəsinə inşa edilən bulaq istifadəyə verilib VİDEO
Şirvan, 22 avqust, Aydın Yavərzadə, AZƏRTAC
Vətən müharibəsi zamanı canından keçərək şəhidlik zirvəsinə ucalan Röyal Məmmədovun xatirəsi anılıb. Şəhidin xatirəsinə inşa edilən bulağın açılışı olub.
AZƏRTAC-ın bölgə müxbiri xəbər verir ki, şəhid Röyal Məmmədovun anım günündə ailəsi ilə bərabər rayon icra hakimiyyətinin əməkdaşları, şəhər sakinləri, məktəblilər və Röyalın döyüşçü yoldaşları iştirak edib. Çıxış edənlər Vətən müharibəsində torpaqlarımızı düşmən tapdağından canı bahasına azad edən və Şəhidlik zirvəsinə yüksələn əsgər Məmmədov Röyal Misil oğlunun xatirələrindən söhbət açıb. Qeyd edilib ki, Röyal və digər şəhidlərimiz hər biri qəhrəmanlıq dastanı yazaraq gələcək nəsillərə əsl vətənpərvərlik nümunəsi oldu. Bildirilib ki, Röyal Məmmədov 12 oktyabr 1990-cı ildə Şamaxı rayonunun Kürdəmic kəndində anadan olub. 1997-ci ildə Şirvan şəhər 13 nömrəli tam orta məktəbin 1-ci sinfinə daxil olub, 2006-cı ildə həmin məktəbin 9-cu sinfini bitirib. Təhsilini Şirvan Peşə Liseyində davam etdirib, 2009-cu ildə Peşə Liseyini Radioteleviziya aparatlarının (videotexnikanın) təmiri və xidməti üzrə mexanik ixtisası ilə bitirib. Elə həmin ilin aprel ayında Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Şirvan Şəhər Şöbəsi tərəfindən Azərbaycan Silahlı Qüvvələrinə həqiqi hərbi xidmətə çağırılıb, 2010-cu ildə hərbi xidmətdən tərxis olunub. İstər yeniyetmə, istərsə də gənclik illərində ürəyi hər zaman Vətən sevgisi ilə döyünən Röyal könüllü olaraq cəbhəyə yollanıb. Döyüşlər ərəfəsində bir sıra uğurlu əməliyyatlarda iştirak edən Röyal düşmənin canlı qüvvəsinin və texnikalarının məhv edilməsində iştirak edib. Həmçinin strateji yüksəkliklərin əldə olunmasında və torpaqlarımızın işğaldan azad edilməsində şücaəti ilə seçilib. Oktyabr ayının 24-də Qubadlı uğrunda gedən gərgin döyüşlər zamanı namərd gülləsinə tuş gələn Röyal müqəddəs şəhidlik məqamına yüksəlib. Azərbaycanın ərazi bütövlüyünün bərpa olunması, doğma yurdumuzun, Vətən torpaqlarının düşmən tapdağından azad edilməsi uğrunda ölümün gözünə dik baxan Röyal Məmmədovun döyüşlərdə göstərdiyi igidlik dövlətimiz, ölkə rəhbəri tərəfindən də yüksək qiymətləndirilib. Şəhid əsgər Röyal Məmmədov ölümündən sonra “Vətən uğrunda”, “Cəbrayılın azad olunmasına görə" və “Qubadlının azad olunmasına görə” medalları ilə təltif olunub.
Röyalın böyüyüb boya-başa çatdığı küçədə onun adını daşıyan şəhid bulağının açılış mərasimində qəhrəman şəhidimizin xatirəsi əziz tutulub, ruhuna dualar oxunub. Həmçinin məktəblilər tərəfindən ədəbi-bədii kompozisiya nümayiş olunaraq vətənpərvərliyə və qəhrəmanlara həsr edilən şerlər səsləndirilib.
Bölmənin digər xəbərləri
