“2006-CI İLDƏ DÜNYADA BAŞ VERMİŞ FƏLAKƏTLƏRİN HESABATI” NƏŞRİ TƏQDİM EDİLMİŞDİR
Yerli və xarici qeyri-hökumət təşkilatları, diplomatik korpus nümayəndələrinin iştirak etdiyi təqdimat mərasiminin açılışında Federasiyanın Bakıdakı nümayəndəliyinin informasiya şöbəsinin rəhbəri Səbinə Məhbubi, Türkiyə və Cənubi Qafqaz üzrə regional proqram əlaqələndiricisi Reyhan Elmalıdaq, Azərbaycan Qızıl Aypara Cəmiyyətinin vitse-prezidenti Qafar Əsgərzadə çıxış etmiş, tədbirin əhəmiyyətini vurğulamışlar.
Federasiyanın Bakıdakı nümayəndəliyinin rəhbərini əvəz edən Faiq Tahirli Hesabat barədə məlumat vermişdir. Bildirmişdir ki, hesabatın builki nəşrində beynəlxalq ictimaiyyətin diqqətindən yayınmış adamların yaşayış tərzi, o cümlədən Afrika ölkələrindəki ərzaq böhranı, Cənubi Asiyada ana ölümü, Amerikada təkrar baş verən böhranlar, Avropaya qeyri-qanuni miqrasiya, fəlakətlər zamanı gender bərabərsizliyinə yol verilməsi halları öz əksini tapmışdır.
Hesabata dair OXFAM və UNHCR təşkilatlarının çəkdiyi film nümayiş etdirilmişdir.
Azərbaycan Qızıl Aypara Cəmiyyəti fövqəladə hallara hazırlıq və cavabvermə şöbəsinin rəisi Elşən Səlimzadə 2001-2006-cı illərdə ölkəmizdə baş vermiş müxtəlif təbii fəlakətlərlə əlaqədar atılan addımlar, İİV/QİÇS layihəsinin əlaqələndiricisi Şaban Şayev respublikada İİV/QİÇS, sağlamlıq şöbəsinin müdiri Mətanət Qaraxanova isə qan donorluğu problemləri haqqında danışmışlar.
