Zirehli gödəkçəsini əsgərinə verib özü şəhid olan leytenant Sərvan Göyüşov – REPORTAJ VİDEO
Ağdam, 19 oktyabr, Tahir Ağaməmmədov, AZƏRTAC
Otuz ilə yaxın işğal altında qalan torpaqlarımız müzəffər Ordumuzun, əsgər və zabitlərimizin şücaəti, qəhrəmanlığı sayəsində azad edildi. Bu müqəddəs yolda zabit və əsgərlərimizin bir qismi şəhid, bir qismi isə qazi oldu. Vətən müharibəsində şəhidlik zirvəsinə ucalanlardan biri də Ağdam rayon sakini Göyüşov Sərvan Mehman oğludur.
Sərvan Göyüşov 1997-ci ildə məcburi köçkünlər üçün salınmış çadır şəhərciyində anadan olub. Ata-baba yurdu Ağdam rayonunun Qiyaslı kəndini görməsə də, hər zaman doğma torpaqların həsrəti ilə yaşayıb. Hələ uşaqlıqdan hərbiçi olmaq, torpaqlarımızı işğaldan azad etmək arzusunda olub. Bu amalla Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Azərbaycan Ordusunun leytenantı olan Sərvan Göyüşov 2020-ci il sentyabrın 27-də başlanan Vətən müharibəsi zamanı Murovdağ istiqamətində gedən döyüşlərdə şəhadətə yüksəlib.
AZƏRTAC-ın bölgə müxbiri Ağdam rayonunun Bənövşələr qəsəbəsində şəhidin valideynləri ilə görüşüb, onlarla qəhrəman Vətən oğlunun həyatı və şərəfli döyüş yolu haqqında söhbət edib.
Atası Mehman Göyüşov deyir ki, Birinci Qarabağ müharibəsində ailəsi çox acı çəkib – şəhidlər verib, torpaqları işğal olunub. “Qardaşım şəhiddir. Əmim və nənəm də mülki şəhidlərdir. Kəndimiz işğal olunanda nənəm kənddə qalıb, ermənilər girov götürərək onu öldürüblər. Dayım oğlu da şəhiddir. 1992-ci ildə qardaşım müharibədə itkin düşmüşdü. Dözə bilmədim, mən də müharibəyə getdim. 1993-1994-cü illərdə döyüşlərdə olmuşam, yaralanmışam, ikinci qrup Qarabağ müharibəsi əliliyəm. Ordudan tərxis olunandan sonra ailə qurdum, iki övladım oldu. Uşaqlar köçkünlük illərində doğulublar. Mənim müharibədə aldığım yaraları görürdülər. Əmilərinin itkin düşdüyünü, mənim əmimin, nənəmin şəhid olduğunu bilirdilər. Ona görə də Sərvan elə uşaq vaxtından hərbiçi olmaq arzusunda idi. Beləliklə, Ali Hərbi Məktəbə qəbul oldu. 2018-ci ildə Ali Hərbi Məktəbi bitirib N saylı hərbi hissədə zabit kimi xidmətə başladı. Bir il xidmət edəndən sonra öz ərizəsi ilə xidmətini ön xətdə - Murovdağda davam etdirdi. 2020-ci il sentyabrın 27-də müharibə başlayanda Murovdağ yüksəkliyində döyüşlərdə iştirak edib. Oktyabrın 1-də döyüş gedən zaman öz zirehli gödəkçəsini çıxarıb əsgərinə verib. Düşmən minaatanla posta atəş açanda qəlpə oğlumun ürəyinə dəyib və o, şəhid olub. Oktyabrın 3-də Quzanlı qəsəbəsindəki Şəhidlər xiyabanında dəfn etdik. Mən oğlumla fəxr edirəm...”, - deyə o bildirib.
Anası Adilə xanım Sərvan haqqında danışmağın nə qədər çətin, amma qürurlu olduğunu qeyd edərək deyib: “Sərvan qorxmaz, vətənpərvər idi. Bu hisslər ona atasından keçmişdi. Arzuları çox idi... Şəhid anası olmaq qürurvericidir. Bu adı gərək elə daşıyasan ki, şəhidin ruhu şad olsun. Oğlum Vətənimizin bütövlüyü uğrunda mübarizədə şəhid olub. Bununla qürur duyuruq”.
Xatırladaq ki, Sərvan Göyüşov Azərbaycan Prezidentinin sərəncamlarına əsasən, ölümündən sonra "Vətən uğrunda", "Kəlbəcərin azad olunmasına görə" və "Hərbi xidmətlərə görə" medalları ilə təltif edilib.
Bölmənin digər xəbərləri
