İQTİSADİYYAT
AĞDAŞIN DAHA 6 KƏNDİNƏ TƏBİİ QAZ VERİLƏCƏKDİR
Ağdaş, 30 avqust (AZƏRTAC). Ağdaş rayonunda əhalinin təbii qazla təminatının yaxşılaşdırılması məqsədilə ardıcıl işlər görülür.
“Ağdaş Qaz İstismar” MMC-dən bildirmişlər ki, hazırda rayonun Xosrov, Korarx, Qəribli, Mürsəl, Şəkili və Şıxlı kəndlərində köhnə qaz xətlərinin yararsız hissələri dəyişdirilir, yeni şkaflar, siyirtmələr quraşdırılır. Yaxın vaxtlarda qaz sayğaclarının quraşdırılmasına başlanılacaqdır. Dekabr ayınadək həmin kəndlərin əhalisinə təbii qazın verilməsi planlaşdırılır. Bu kəndlərdə 500-ə yaxın ev təbii qazla təmin olunacaqdır.
Xatırladaq ki, bu ilin əvvəlində rayonun Hüşün, Dəhnəxəlil, İkinci Aral və Yeniarx kəndləri qazlaşdırılmışdır.
Hazırda Ağdaş şəhərində və rayonun 28 kəndində əhali təbii qazdan istifadə edir.