MƏDƏNİYYƏT
Mühacir ədəbiyyatımızın görkəmli nümayəndəsi Ceyhun Hacıbəylinin şəxsi arxivi mövzular üzrə qruplaşdırılmışdır
Bakı, 25 yanvar (AZƏRTAC). Yazıçı, salnaməçi, jurnalist, tərcüməçi-redaktor Ceyhun Hacıbəylınin 120 illik yubileyi ilə bağlı ədibin Salman Mümtaz adına Azərbaycan Dövlət Ədəbiyyat və İncəsənət Arxivindəki 649 nömrəli fondunda ayrı-ayrı mövzular üzrə qruplaşmalar aparılmışdır.
Arxivin direktoru Maarif Teymurov AZƏRTAC-a bildirmişdir ki, fondda saxlanılan sənədlərin üç elmi siyahısı sistemləşdirilmişdir. Hazirda Ceyhun Hacıbəylinin fondunda 20 mindən artıq sənəd vardır. Bu sənədlərin əksəriyyəti rus, ingilis və fransız dillərindədir.
Ötən ilin sonlarında mühacir ədəbiyyatının tədqiqatçılarından olan Ramiz Abutalıbov C.Hacıbəyli ilə bağlı bir çox sənədləri arxivə təqdim etmişdir. Bu yaxınlarda yeni sənədlər də gətiriləcəkdir və daha sonra Ceyhun Hacıbəylinin 4-cü elmi siyahısı hazırlanacaqdır. Bu siyahılar onunla bağlı maraqlanan, tədqiqat aparan hər kəsin zəngin informasiya əldə etməsinə imkan yaradacaqdır.
Ceyhun Hacıbəyli 1891-cı il fevralın 3-də Şuşa şəhərində anadan olmuşdur. Adı Azərbaycanın azadlıq tarixinə qızıl hərflərlə yazılmış C.Hacıbəyli mühacirətdə yaşadığı bütün dövrdə (1919-1962) əqidə və amalından dönməmiş, son nəfəsinədək sovet imperiyası ilə ideoloji mübarizə aparmış, Azərbaycanın müstəqilliyi uğrunda çalışmışdır. Dahi Azərbaycan bəstəkarı Üzeyir Hacıbəylinin qardaşı olan C.Hacıbəylinin qəbri Paris şəhərindədir.